سیکرٹری ہاؤسنگ پنجاب نور الامین مینگل نے واسا ہیڈ آفس لاہور کا دورہ کیا جہاں ان کا استقبال منیجنگ ڈائریکٹر واسا غفران احمد نے کیا۔ اس موقع پر ایک اعلیٰ سطحی اجلاس کا انعقاد کیا گیا جس کی صدارت سیکرٹری ہاؤسنگ نے کی۔اجلاس میں ڈائریکٹر جنرل واسا پنجاب طیب فرید، ڈپٹی کمشنر لاہور موسیٰ رضا اور ایڈیشنل سیکرٹری ہاؤسنگ عمر فاروق سمیت دیگر اعلیٰ افسران نے شرکت کی۔اجلاس کے دوران ایم ڈی واسا غفران احمد نے واسا لاہور کے جاری اور مجوزہ ترقیاتی منصوبوں پر تفصیلی بریفنگ دی۔ انہوں نے بتایا کہ لاہور میں بارش کے پانی کو محفوظ بنانے کے لیے جدید واٹر اسٹوریج ٹینکس اور ایکوافائر ریچارجنگ سسٹم پر تیزی سے کام جاری ہے۔ لاہور میں 10 نئے زیر زمین واٹر ٹینکس پر کام جاری ہے، جنہیں مون سون سیزن سے قبل فعال کر دیا جائے گا۔سیکرٹری ہاؤسنگ کو لاہور ڈویلپمنٹ پروگرام، سرفس واٹر ٹریٹمنٹ پلانٹ اور ٹنل بورنگ جیسے منصوبوں پر ہونے والی پیش رفت سے بھی آگاہ کیا گیا۔ سیکرٹری ہاؤسنگ نور الامین مینگل نے لاہور ڈویلپمنٹ پروگرام فیز 1 اور 2 پر کام کی رفتار مزید تیز کرنے اور تمام منصوبوں میں حفاظتی اقدامات یقینی بنانے کی ہدایات جاری کی گئیں۔ایم ڈی واسا نے بریفنگ میں بتایا کہ بی آر بی کینال سے 100 کیوسک پانی حاصل کر کے سرفس واٹر ٹریٹمنٹ پلانٹ کے ذریعے صاف کیا جائے گا، جس سے شادی پورہ، مصطفیٰ آباد، فتح گڑھ اور باغبانپورہ کے لاکھوں مکینوں کو صاف پانی میسر آئے گا۔ یہ منصوبہ نہ صرف تقریباً 10 لاکھ شہریوں کو مستفید کرے گا بلکہ زیر زمین پانی کی سطح میں کمی کو روکنے میں بھی معاون ثابت ہوگا۔لاریکس کالونی سے گلشن راوی تک ٹرنچ لیس ٹیکنالوجی کے ذریعے 25 کلومیٹر طویل ٹنل بورنگ منصوبہ بھی شروع کیا جائے گا۔اجلاس میں بابو صابو واٹر ٹریٹمنٹ پلانٹ پر بھی تبادلہ خیال کیا گیا، جبکہ پنجاب بھر کی تمام رہائشی سوسائٹیز کو ویسٹ واٹر فلٹریشن پلانٹس نصب کرنے کی ہدایات جاری کی گئیں۔سیکرٹری ہاؤسنگ نور الامین مینگل نے واسا لاہور کے منصوبوں کو وزیر اعلیٰ پنجاب مریم نواز شریف کے ترقیاتی وژن کی عملی تعبیر قرار دیا اور کہا کہ عوام کو بہترین سہولیات کی فراہمی حکومت کی اولین ترجیح ہے۔انہوں نے واسا کے دائرہ کار کو پنجاب کے دیگر شہروں تک وسعت دینے اور لاہور کی طرز پر ترقیاتی منصوبے شروع کرنے کی ہدایات بھی جاری کیں۔
سیکرٹری ہاؤسنگ نے مون سون سے قبل تمام ہیوی مشینری اور ڈسپوزل اسٹیشنز کی ایفیشینسی آڈٹ کرانے کی ہدایات دیں اور واسا لاہور کے واٹر ٹینکس منصوبے کو سراہتے ہوئے پانی کے ضیاع کو روکنے کے لیے مزید مؤثر اقدامات کی تاکید کی۔ بعد ازاں سیکرٹری ہاؤسنگ نور الامین مینگل نے قذافی اسٹیڈیم میں زیر زمین واٹر ٹینک کا دورہ بھی کیا اور جاری کام کا جائزہ لیا۔
