کمشنر لاہورمریم خان نے ٹاون شپ رمضان سہولت بازار کا دورہ کیا۔ اس موقع پر ڈی سی لاہور کیپٹن ر علی اعجاز اور ایس ایس پی آپریشنز توقیر احمد بھی ہمراہ موجود تھے۔ کمشنر لاہور نے آٹا، دالوں، گھی گوشت، چینی، پھلوں و سبزیوں کی سہولت بازار میں وافر دستیابی و فراہمی کو خصوصی طور پر چیک کیا۔ انہوں نے صفائی، پارکنگ، سکیورٹی و دیگر سہولیات کا جائزہ لیا۔اس موقع پر گفتگو کرتے ہوئے کمشنرلاہور نے کہا کہ سہولت بازاروں میں پھل سبزیاں گوشت سمیت تمام اشیاء کی بہترین کوالٹی موجود ہے، رمضان سہولت بازاروں کے ساتھ اوپن مارکیٹ پر بھی سخت چیک رکھا جارہا ہے۔کمشنر لاہور نے بازار میں شہریوں سے اشیاء کی دستیابی و قیمتوں کے حوالے سے فیڈ بیک لیا۔ انہوں نے سہولت بازار میں قائم مختلف فعال کاونٹرز کو چیک کیا۔
