ڈپٹی کمشنر لاہور آفس میں انسداد پولیو مہم کے پہلے روز کا جائزہ اجلاس منعقد ہوا۔ اجلاس کی مشترکہ صدارت کوآرڈینیٹر نیشنل ایمرجنسی آپریشنز سینٹر کیپٹن (ر) محمد انوار الحق، ایمرجنسی آپریشنز سینٹر کے کوآرڈینیٹر عدیل تصور اور ڈپٹی کمشنر لاہور سید موسیٰ رضا نے کی۔ اجلاس میں ایڈیشنل ڈپٹی کمشنر جنرل کیپٹن (ر) زخرف فدا ملک، چیف ایگزیکٹو آفیسر ڈسٹرکٹ ہیلتھ اتھارٹی ڈاکٹر آصف ارباب، تمام اسسٹنٹ کمشنرز، عالمی ادارہ صحت کے مبصرین اور دیگر متعلقہ افسران نے شرکت کی۔ ضلعی انتظامیہ لاہور نے انسداد پولیو مہم کے پہلے روز غیر معمولی کارکردگی کا مظاہرہ کرتے ہوئے وزیر اعلیٰ پنجاب کے ‘زیرو پولیو پنجاب’ ویژن کو یقینی بنانے کے لیے اپنے عزم کا اعادہ کیا ہے۔ اجلاس میں سی ای او ہیلتھ ڈاکٹر آصف ارباب نے تفصیلی بریفنگ دیتے ہوئے بتایا کہ شہر بھر میں 6 ہزار سے زائد پولیو ٹیمیں مصروف عمل ہیں جنہوں نے پہلے روز ہی 4 لاکھ 20 ہزار 221 بچوں کو ویکسین دی، جو ہدف کا 87 فیصد ہے۔ اس دوران سیلاب زدہ علاقوں میں 11 ہزار 809 بچوں تک رسائی یقینی بنائی گئی جبکہ 31 ہزار 140 مہمان بچوں اور سکولوں میں 57 ہزار 170 بچوں کو بھی پولیو کے قطرے پلائے گئے۔ عالمی ادارہ صحت کے مبصرین نے ضلعی انتظامیہ لاہور کی کوششوں کو سراہا، جبکہ نیشنل ای او سی کوآرڈینیٹر کیپٹن (ر) محمد انوار الحق نے نئی ٹیلی شیٹس کو خوش آئند قرار دیتے ہوئے کہا کہ پولیو کیسز کی تعداد اب تک کی کم ترین سطح پر ہے اور بچوں میں امیونٹی گیپس میں مسلسل کمی آ رہی ہے۔ ڈپٹی کمشنر لاہور سید موسیٰ رضا نے تمام ڈی ڈی ایچ اوز کو فیلڈ میں سخت مانیٹرنگ یقینی بنانے کی ہدایت کی اور زور دیا کہ کوئی بچہ پولیو ویکسین کے بغیر نہیں رہنا چاہیے اور رہ جانے والے ہر بچے تک ٹیم کی رسائی یقینی بنائی جائے۔ انہوں نے کہا کہ ضلعی انتظامیہ اسے قومی فریضہ سمجھ کر کام کر رہی ہے اور پولیو فری لاہور کے لیے سب کو مل کر کام کرنا ہوگا۔ ای او سی کوآرڈینیٹر عدیل تصور نے مہمان بچوں کا اندراج مختص کالم میں درست طریقے سے کرنے کی اہمیت پر زور دیا۔ اس مربوط اور موثر کارروائی نے ضلعی انتظامیہ کی بہترین انتظامی صلاحیتوں کو اجاگر کیا ہے، جس کا مقصد لاہور کے مستقبل کو پولیو کے خطرے سے مکمل طور پر پاک کرنا ہے۔
