وزیراعلٰی مریم نواز شریف کی ہدایت پر وزیر بلدیات ذیشان رفیق نے لاہور کے نواحی علاقے لکھوڈیر میں سُتھرا پنجاب کے پہلے ویسٹ ٹو ویلیو منصوبے کا دورہ کیا۔ انہوں نے لکھوڈیر ڈمپنگ سائٹ پر پائلٹ بائیوگیس پلانٹ کا معائنہ کرتے ہوئے ضروری ہدایات جاری کیں۔ اس موقع پر سیکرٹری لوکل گورنمنٹ شکیل احمد میاں اور ڈی جی سُتھرا پنجاب اتھارٹی بابر صاحب دین بھی موجود تھے۔ ذیشان رفیق کو پائلٹ بائیوگیس پراجیکٹ سمیت ویسٹ ٹو ویلیو فیز پر بریفنگ بھی دی گئی۔وزیر بلدیات نے اس عزم کا اعادہ کیا کہ ویسٹ ٹو ویلیو پروگرام کا دائرہ مرحلہ وار وسیع کیا جائے گا۔ انہوں نے کہا کہ بائیوگیس پراجیکٹ کے بعد بجلی کی تیاری کے منصوبے پر کام جاری ہے۔ اس کے لئے روزانہ ہزاروں ٹن جمع ہونے والے کچرے کو بروئے کار لایا جائے گا۔ وزیراعلی مریم نواز شریف نے ویسٹ ٹو ویلیو کیلئے ٹھوس اقدامات کرنے کی ہدایت کی ہے۔ ذیشان رفیق نے کہا کہ یہ پاکستان میں الائشوں سے بائیو سی این جی کی تیاری کا پہلا کامیاب تجربہ ہے۔ گزشتہ عیدالاضحی پر جمع الائشوں سے بائیوگیس کی تیاری شروع ہوئی جو کامیابی سے جاری ہے۔ انہوں نے کہا کہ آلائشیں ٹھکانے لگانے پر بھاری خرچہ کرنے کی بجائے الٹا اب آمدن ہوگی۔ صوبائی وزیر نے ڈی جی سُتھرا پنجاب اتھارٹی اور اُن کی ٹیم کو شاباش دیتے ہوئے کہا کہ پاک سُوزوکی کمپنی نے نامیاتی ویسٹ سے کھاد کی تیاری میں دلچسپی ظاہر کی ہے۔ انہوں نے کہا کہ ویسٹ سے تعمیراتی اینٹیں بنانے کی پیشکش کا بھی جائزہ لے رہے ہیں۔ذیشان رفیق نے کہا کہ لاہور کے بعد دیگر بڑے شہروں میں بھی ایسے منصوبے شروع ہونگے۔ انہوں نے کہا کہ سُتھرا پنجاب دنیا کا صفائی کا سب سے بڑا پروگرام بن چکا ہے۔ وزیراعلی مریم نواز کے ویژن سے صفائی کا شاندار انفراسٹرکچر تیار ہوا۔ ملک کی تاریخ میں پہلی بار کُوڑے کی محفوظ ڈمپنگ کو یقینی بنایا گیا ہے۔
