*پنجاب میں واش سیکٹر کی سب سے بڑی آگاہی مہم شروع کرنے کی تیاری*

پنجاب میں واش سیکٹر سے متعلق صوبہ گیر آگاہی مہم کا آغاز کیا جا رہا ہے، جس کے تحت تمام اضلاع کے واسا پبلک ریلیشنز آفیسرز (پی آر اوز) کو الجزاری واٹر اکیڈمی میں اربن فلڈنگ، صاف پانی اور سیوریج سے متعلق عوامی پیغام رسانی کی تربیت دی گئی۔اس اقدام کے تحت محکمہ ہاؤسنگ، اربن ڈویلپمنٹ و پبلک ہیلتھ انجینئرنگ نے صوبے بھر کے واساز کے پی آر اوز کو پانی، صفائی اور حفظانِ صحت (واش) کے لیے ایک مربوط کمیونیکیشن فریم ورک کے تحت یکجا کر دیا ہے۔ جمعہ کے روز منعقدہ یہ ایک روزہ تربیتی سیشن صوبے کی تاریخ میں اپنی نوعیت کا پہلا سیشن تھا۔سیشن سے خطاب کرتے ہوئے الجزاری واٹر اکیڈمی کے پرنسپل ڈاکٹر سومن خالد نے واش سیکٹر میں نچلی سطح تک آگاہی کی ضرورت پر زور دیا اور کہا کہ صاف پانی، صفائی اور حفظانِ صحت کے لیے عوامی شعور بنیادی اہمیت رکھتا ہے۔ انہوں نے 41 اضلاع کے پی آر اوز پر زور دیا کہ وہ دیانت داری، وقار اور محنت کے ساتھ اس شعبے میں دیرپا اثرات مرتب کریں۔سیشن کے مرکزی ٹرینرز میں شامل پروفیسر ڈاکٹر عدیل احمد عامر نے پی آر اوز کو کراس میڈیا میسجنگ کی حکمتِ عملی کی تربیت دی اور اپنے اضلاع کے لیے آگاہی منصوبے تیار کرنے میں ان کی رہنمائی کی۔ سوشل میڈیا شخصیت اور ٹرینر حافظ باسط علی نے شرکاء کو ڈیجیٹل پلیٹ فارمز کے لیے مؤثر پیغامات تیار کرنے کی تربیت دی۔شرکاء نے ایک کوآرڈینیشن فریم ورک کا بھی جائزہ لیا، جس کے تحت ضلعی پی آر اوز مشترکہ مہمات چلائیں گے، بحرانی صورتحال میں رابطے کے یکساں ضابطۂ کار پر عمل کریں گے اور اردو کو ترجیح دیتے ہوئے فیلڈ سے مواد تیار کریں گے۔الجزاری واٹر اکیڈمی کے وائس پرنسپل حافظ عزیر احمد نے شرکاء کو مارچ 2027 میں منعقد ہونے والی "پائیدار، اسمارٹ اور موسمیاتی لحاظ سے مستحکم واٹر سسٹمز” پر پہلی بین الاقوامی کانفرنس کے بارے میں بریفنگ دی۔ انہوں نے پی آر اوز پر زور دیا کہ وہ اپنے اضلاع میں کانفرنس سے متعلق آگاہی پھیلائیں اور اس میں بھرپور شرکت کریں۔اختتامی تقریب میں شریک پی آر اوز میں تکمیلی اسناد جبکہ ٹرینرز میں شیلڈز تقسیم کی گئیں۔