صوبائی وزیر ہاؤسنگ اینڈ اربن ڈویلپمنٹ بلال یاسین نے وزیراعلیٰ پنجاب مریم نواز شریف کی سالگرہ کی مناسبت سے جیلانی پارک لاہور میں منعقدہ تقریب میں شرکت کی۔ صوبائی وزیر نے پی ایچ اے اور واسا یونین کے ممبران کے ہمراہ سالگرہ کا کیک کاٹا۔ اس موقع پر وائس چیئرمین واسا لاہور چودھری شہباز احمد اور وائس چیئرمین پی ایچ اے غزالی سلیم بٹ بھی موجود تھے۔صوبائی وزیر بلال یاسین نے وزیراعلیٰ پنجاب مریم نواز شریف کو سالگرہ کی مبارک باد پیش کرتے ہوئے ان کی صحت، درازی عمر اور عوامی خدمت کے سفر میں مزید کامیابیوں کیلئے نیک تمناؤں کا اظہار کیا۔ تقریب میں پی ایچ اے اور واسا لاہور یونین کے عہدیداران اور شرکاء نے وزیراعلیٰ پنجاب کے حق میں نعرے بھی لگائے۔اس موقع پر گفتگو کرتے ہوئے صوبائی وزیر بلال یاسین نے کہا کہ ملازمین کسی بھی ادارے کا قیمتی سرمایہ ہوتے ہیں، ورکرز کی فلاح و بہبود اور ان کے مسائل کے حل کیلئے ہر ممکن اقدامات کیے جائیں گے۔ وزیراعلیٰ پنجاب مریم نواز شریف عوامی فلاح و بہبود کے منصوبوں پر بھرپور توانائی صرف کر رہی ہیں اور صوبے کی ترقی و عوامی سہولت کیلئے عملی اقدامات جاری ہیں۔بلال یاسین نے کہا کہ واسا کی پانچ اداروں سے 41 اضلاع تک توسیع سے عوامی مسائل میں واضح کمی اور ادارے کی استعدادِ کار میں اضافہ ہوا ہے۔ اسی طرح صوبے کے تمام اضلاع کی خوبصورتی میں اضافے اور شہری ماحول کو بہتر بنانے کے لیے پارکس اینڈ ہارٹیکلچر اتھارٹی (پی ایچ اے) کا دائرہ کار بھی دیگر اضلاع تک بڑھایا گیا ہے۔صوبائی وزیر نے اس عزم کا اظہار کیا کہ عوامی خدمت، ادارہ جاتی بہتری، ملازمین کی فلاح و بہبود اور پنجاب بھر میں شہری سہولیات کی فراہمی کیلئے اقدامات کا سلسلہ جاری رکھا جائے گا۔
*وزیر ہاؤسنگ بلال یاسین کی مریم نواز شریف کی سالگرہ کی مناسبت سے منعقدہ تقریب میں شرکت*
