ڈی سی لاہور کیپٹن (ر) محمد علی اعجاز کی زیر قیادت ضلعی انتظامیہ لاہور نے وزیراعلیٰ پنجاب کی خصوصی ہدایت پر شہر بھر میں گرانفروشوں اور ذخیرہ اندوزوں کے خلاف بلا تفریق اور سخت ترین کریک ڈاؤن کا آغاز کر دیا ہے، جس کے دور رس نتائج سامنے آنا شروع ہو گئے ہیں۔ ضلعی انتظامیہ لاہور کی ٹیموں نے ڈپٹی کمشنر کی براہ راست نگرانی میں شہر کے مختلف بازاروں اور مارکیٹوں میں مجموعی طور پر 6,389 مقامات پر انسپکشنز کیں، جس کے دوران قیمتوں میں خود ساختہ اضافے اور دیگر خلاف ورزیوں پر 8 لاکھ 71 ہزار روپے کے بھاری جرمانے عائد کیے گئے۔ ڈی سی لاہور کیپٹن (ر) محمد علی اعجاز کے حکم پر فیلڈ میں متحرک 90 پرائس کنٹرول مجسٹریٹس نے کارروائی کرتے ہوئے گرانفروشی پر 14 مقدمات درج کروائے، 12 املاک کو موقع پر سیل کیا جبکہ 24 افراد کو حراست میں لے کر قانونی کارروائی کا آغاز کر دیا گیا۔ ضلعی انتظامیہ لاہور کی جانب سے سپلائی چین کی کڑی نگرانی کے نتیجے میں مارکیٹ میں اشیائے ضروریہ کی قیمتیں مستحکم ہو رہی ہیں؛ خاص طور پر آلو کے 52، پیاز کے 56 اور ٹماٹر کے 36 ٹرکوں کی آمد سے منڈیوں میں رسد میں اضافہ ہوا ہے اور بھنڈی سمیت دیگر سبزیوں کی قیمتوں میں کمی ریکارڈ کی گئی ہے۔ ڈپٹی کمشنر لاہور نے واضح کیا ہے کہ سرکاری نرخ نامے پر عملدرآمد ہر صورت یقینی بنایا جائے گا اور سبزی منڈیوں میں اشیاء کی فراہمی پر مسلسل نظر رکھی جا رہی ہے تاکہ شہریوں کو ریلیف فراہم کیا جا سکے۔ انہوں نے شہریوں سے بھی اپیل کی ہے کہ وہ کسی بھی شکایت کی صورت میں ضلعی انتظامیہ لاہور کے سوشل میڈیا پیجز یا کنٹرول روم پر فوری رابطہ کریں۔
