مون سون سے قبل کراچی کے بڑے نالوں کی جامع صفائی مہم شروع کرنے کا فیصلہ

مئیر کراچی بیرسٹر مرتضیٰ وہاب نے کہا ہے کہ بلدیہ عظمیٰ کراچی نے آئندہ مون سون سیزن کے پیشِ نظر شہر بھر کے بڑے برساتی نالوں کی جامع صفائی مہم شروع کرنے کا فیصلہ کیا ہے تاکہ بارش کے پانی کی روانی کو یقینی بنایا جا سکے اور شہری سیلاب کے خطرات کو کم سے کم کیا جا سکے۔ یہ فیصلہ میئر کراچی بیرسٹر مرتضیٰ وہاب کی زیرِ صدارت منعقدہ ایک اعلیٰ سطحی اجلاس میں کیا گیا، جس میں جاری ترقیاتی منصوبوں اور بلدیاتی خدمات کی پیش رفت کا جائزہ لیا گیا۔ اجلاس میں مون سون کی تیاریوں، شہری انفراسٹرکچر اور کراچی بھر میں نکاسیٔ آب کے نظام کو بہتر بنانے کے اقدامات پر تفصیلی غور کیا گیا۔ اجلاس کے دوران میونسپل کمشنر کے ایم سی ابرار جعفر نے میئر کراچی کو بریفنگ دیتے ہوئے بتایا کہ بڑے نالوں کی صفائی اور ڈی سلٹنگ کے لیے ٹینڈرز جاری کیے جا چکے ہیں جبکہ بولیاں پیر کے روز کھولی جائیں گی۔ خریداری کے عمل کی تکمیل کے فوراً بعد صفائی کا کام شروع کر دیا جائے گا تاکہ مون سون بارشوں سے قبل تمام بڑے نالوں کی مکمل صفائی یقینی بنائی جا سکے۔ انہوں نے بتایا کہ کے ایم سی نے شہر بھر میں نالوں کی صفائی مہم کے لیے 60 کروڑ روپے مختص کیے ہیں، جو بارشوں کے موسم میں شہریوں اور عوامی انفراسٹرکچر کے تحفظ کے عزم کی عکاسی کرتا ہے۔ میئر کراچی بیرسٹر مرتضیٰ وہاب نے ہدایت کی کہ صفائی کے عمل کی شفاف نگرانی، معیار کی جانچ اور بروقت تکمیل کو یقینی بنانے کے لیے ایک تھرڈ پارٹی کنسلٹنٹ کی خدمات حاصل کی جائیں۔ انہوں نے زور دیا کہ پورے آپریشن کے دوران سخت نگرانی برقرار رکھی جائے تاکہ عوامی فنڈز کے مؤثر استعمال اور اعلیٰ معیار کی پاسداری کو یقینی بنایا جا سکے. فنانشل ایڈوائزر کے ایم سی گلزار ابڑو نے اجلاس میں ضلع وار فنڈز کی تقسیم کی تفصیلات پیش کیں۔ منظور شدہ منصوبے کے مطابق ضلع سینٹرل کے لیے 6 کروڑ 80 لاکھ روپے، ضلع ویسٹ اور کیماڑی کے لیے 7 کروڑ روپے، ساؤتھ-I کے لیے 5 کروڑ 60 لاکھ روپے، ضلع ساؤتھ کی تقسیم کے بعد ساؤتھ-II کے لیے 6 کروڑ 50 لاکھ روپے، ضلع ایسٹ کے لیے 7 کروڑ 30 لاکھ روپے، ضلع کورنگی کے لیے 7 کروڑ روپے جبکہ ضلع ملیر کے لیے 5 کروڑ 80 لاکھ روپے مختص کیے گئے ہیں۔ اس کے علاوہ شہر کے مختلف اجتماعی نکاسیٔ آب کے مقامات، جہاں خصوصی توجہ درکار ہے، کے لیے 7 کروڑ 40 لاکھ روپے اور 6 کروڑ 30 لاکھ روپے بھی مختص کیے گئے ہیں۔ اجلاس سے خطاب کرتے ہوئے میئر کراچی نے کہا کہ کے ایم سی شہر بھر میں ایک وسیع ترقیاتی پروگرام پر بیک وقت کام کر رہی ہے، اس لیے یہ ضروری ہے کہ تمام نالے مکمل طور پر فعال رہیں تاکہ بارش کے پانی کی بلا تعطل نکاسی ممکن ہو سکے اور مکمل شدہ و جاری ترقیاتی منصوبوں کو محفوظ رکھا جا سکے۔ میئر کراچی بیرسٹر مرتضیٰ وہاب نے کہا کہ گزشتہ سال مون سون کے دوران ہماری کارکردگی بہتر رہی، تاہم اس سال ہمیں اس سے بھی بہتر نتائج دینا ہوں گے۔ تاخیر، غفلت یا لاپرواہی کی کوئی گنجائش نہیں ہوگی۔ میں پانی جمع ہونے یا نالوں کی بندش سے متعلق کوئی شکایت نہیں سننا چاہتا۔ تمام متعلقہ محکمے اس بات کو یقینی بنائیں کہ صفائی کا عمل مقررہ وقت کے اندر مؤثر انداز میں مکمل ہو. انہوں نے اس بات کا اعادہ کیا کہ بروقت منصوبہ بندی اور مربوط بلدیاتی اقدامات ہی شہریوں کو بارشوں سے متعلق مشکلات سے محفوظ رکھ سکتے ہیں، اور کے ایم سی بہتر بلدیاتی سہولیات کی فراہمی اور ایک مضبوط و مستحکم کراچی کی تعمیر کے لیے پرعزم ہے۔ اجلاس میں میونسپل کمشنر کے ایم سی ابرار جعفر، فنانشل ایڈوائزر گلزار ابڑو، ڈی جی ٹی ایس طارق مغل، ڈائریکٹر میڈیا دانیال سیال سمیت کے ایم سی کے دیگر سینئر افسران نے شرکت کی۔