پولیو ورکرز ہمارے اصل ہیروز ہیں جو مشکل حالات کے باوجود گھر گھر جا کر بچوں کو پولیو کے قطرے پلاتے ہیں۔ پولیو کا خاتمہ حکومت کی اولین ترجیح اور قومی ذمہ داری ہے۔ 2026 تک سندھ کو پولیو فری صوبہ بنانے کا ارادہ رکھتے ہیں۔ وزیر صحت و بہبودِ آبادی سندھ ڈاکٹر عذرا پیچوہو نے ایمرجنسی آپریشنز سینٹر برائے انسدادِ پولیو سندھ کے زیر اہتمام جناح پوسٹ گریجویٹ میڈیکل سینٹر کراچی میں عالمی یومِ پولیو 2025 کی پروقار تقریب سے خطاب کرتے ہوئے کہا کہ تمام پولیو ورکرز، ڈی سیز اور ڈی ایچ اوز کو خراجِ تحسین پیش کرتی ہوں۔ اگر اسی طرح محنت اور تعاون جاری رہا تو انشاء اللہ 2026 میں سندھ کو پولیو فری صوبہ بنائیں گے۔ پولیو ورکرز اپنی جانوں کی پرواہ کیے بغیر عوامی خدمت میں مصروف ہیں۔ ڈاکٹر عذرا پیچوہو نے والدین سے درخواست کی کہ اپنے بچوں کو پولیو کے قطرے پلائیں۔ جس بچے کی قوتِ مدافعت کم ہو پولیو وائرس اسے متاثر کرتا ہے۔ والدین کو سمجھنا ہوگا کہ بظاہر صحت مند بچے بھی اس وائرس کا شکار ہو سکتے ہیں۔ لہٰذا ہر والدین پر فرض ہے کہ وہ اپنے بچوں کو ہر پولیو مہم میں لازمی قطرے پلائیں تاکہ کوئی بچہ محروم نہ رہے۔سندھ حکومت پولیو کے خاتمے کے لیے پرعزم ہے۔ اس موقع پر سیکریٹری صحت ریحان بلوچ، پرونشل کوآرڈینیٹر ای او سی ارشاد سوڈھر، چیئرمین پولیو پلس کمیٹی عزیز میمن، عالمی ادارہ صحت، یونیسف اور دیگر شراکت دار اداروں کے نمائندگان سمیت بڑی تعداد میں محکمہ صحت کے افسران اور فرنٹ لائن پولیو ورکرز نے شرکت کی۔ تقریب میں بچوں کی جانب سے ٹیبلو بھی پیش کیا گیا جبکہ نمایاں کارکردگی دکھانے والے ورکرز میں تعریفی اسناد تقسیم کی گئیں۔ وزیر صحت ڈاکٹر عذرا پیچوہو نے مزید کہا کہ پولیو ورکرز کی انتھک محنت سے سندھ میں کیسز میں نمایاں کمی آئی ہے۔ ہمیں عزم کرنا ہوگا کہ اگلے سال پولیو فری ڈے منائیں۔ اور اگر اسی جذبے سے کام جاری رہا تو جلد پاکستان پولیو فری بن جائے گا۔
