ترجمان محکمہ ہاؤسنگ پنجاب کے مطابق اپنی چھت اپنا گھر پروگرام صوبے میں کم آمدنی والے خاندانوں کے لیے گھر کی فراہمی کا سب سے بڑا اور کامیاب منصوبہ ثابت ہو رہا ہے، جو وزیر اعلیٰ پنجاب کے ویژن کی منفرد مثال ہے۔ترجمان کے مطابق پروگرام کے تحت 35،500 سے زائد خاندان اپنے گھروں کی تعمیر مکمل کر چکے ہیں، جبکہ پروگرام سے مستفید ہونے والے خاندانوں کی مجموعی تعداد 117،159 ریکارڈ کی گئی ہے۔صوبے بھر میں 72،254 خاندانوں کے گھر تیزی سے زیر تعمیر ہیں، اور اب تک **142 ارب روپے سے زائد رقم گھروں کی تعمیر کے لیے مختص کی جا چکی ہے۔ترجمان کے مطابق پروگرام کے تحت خاندانوں کو 9 سال کے لیے بلاسود قرضے فراہم کیے جا رہے ہیں، جن سے ہزاروں خاندان مستفید ہو رہے ہیں۔ آئندہ 5 سال میں 5 لاکھ خاندانوں کو گھروں کی تعمیر کے لیے بلاسود قرض فراہم کیے جائیں گے۔ترجمان کے مطابق کم آمدنی والے خاندانوں کے لیے یہ پروگرام نہایت آسان شرائط کے ساتھ جاری ہے، جس سے صوبے بھر میں دیہاتوں اور قصبوں میں پختہ گھروں کی تعمیر میں نمایاں اضافہ ہو رہا ہے۔ انہوں نے کہا کہ پروگرام کے مثبت اثرات میں تعمیراتی صنعت کا فروغ بھی شامل ہے، جو صوبے کی معیشت کے لیے خوش آئند ہے۔ترجمان محکمہ ہاؤسنگ کے مطابق شہری پروگرام کی آفیشل ویب سائٹ کے ذریعے گھر بیٹھے درخواست جمع کروا سکتے ہیں، جس سے شفافیت اور سہولت دونوں کو یقینی بنایا جا رہا ہے۔
