وزیراعلیٰ پنجاب مریم نواز کی ہدایت پر کھلے مین ہولز کے خلاف زیرو ٹالرنس پالیسی کے تحت محکمہ ہاؤسنگ نے کارروائی کرتے ہوئے ذیشان منظور، ایگزیکٹو انجینئر راوی ٹاؤن کو معطل کر دیا۔لاہور کے علاقے فاروق گنج میں کھلے مین ہول کا انکشاف ہوا تھا۔ مین ہول کو بروقت کور نہ کرنے اور فرائض کی ادائیگی میں غفلت پر سیکرٹری ہاؤسنگ نورالامین مینگل نے متعلقہ افسر کے خلاف کارروائی عمل میں لائی۔سیکرٹری ہاؤسنگ نورالامین مینگل نے کہا کہ فرائض کی ادائیگی میں غفلت ہرگز برداشت نہیں کی جائے گی۔ انہوں نے واضح کیا کہ غفلت اور نااہلی کے مرتکب افسران اپنی سیٹوں پر نہیں رہیں گے۔نورالامین مینگل نے کہا کہ "کوئی خبر چھپی نہیں، افسران اپنا قبلہ درست کرلیں۔” عوامی جان و مال کے تحفظ میں غفلت کا کوئی جواز قابل قبول نہیں ہوگا۔انہوں نے مزید کہا کہ وزیراعلیٰ پنجاب کی ہدایت پر اوپن مین ہولز کے خلاف زیرو ٹالرنس پالیسی اپنائی گئی ہے اور تمام متعلقہ افسران کو اپنی ذمہ داریاں پوری کرنے کی ہدایت کی گئی ہے۔
*سیکرٹری ہاؤسنگ نورالامین مینگل نے ذیشان منظور، ایگزیکٹو انجینئر راوی ٹاؤن کو معطل کر دیا*
