چیئرمین کیپیٹل ڈویلپمنٹ اتھارٹی (سی ڈی اے) محمد علی رندھاوا نے اسلام آباد میں مختلف کیٹیگریز کی نیلامی کے منصوبوں کو حتمی شکل دینے کے لئے اہم اجلاس کی صدارت کی۔
اجلاس میں سی ڈی اے ممبران اور متعلقہ ونگز کے سینئر افسران نے شرکت کی۔چیئرمین سی ڈی اے محمد علی رندھاوا نے ملاقات کے دوران ممکنہ سرمایہ کاروں کو راغب کرنے کے لئے اسلام آباد میں منافع بخش اور سرمایہ کار دوست مواقع فراہم کرنے کی اہمیت پر زور دیا۔ انہوں نے اسلام آباد میں سرمایہ کاری کی صلاحیت کو زیادہ سے زیادہ کرنے کے لئے نیلامی کے لئے اہم ، کاروباری موزوں مقامات کے انتخاب کی ہدایت کی۔چیئرمین سی ڈی اے محمد علی رندھاوا نے مزید بتایا کہ نیلامی میں مختلف قسم کے پلاٹس جیسے کمرشل، ایگرو فارمز، کلاس سوم شاپنگ سینٹرز، صنعتی پلاٹس، آئی اینڈ ٹی سینٹرز، ہوٹل پلاٹس اور اپارٹمنٹ کمپلیکس شامل ہوں گے، جس سے شہر میں سرمایہ کاری کے متنوع اور منافع بخش مواقع فراہم ہوں گے۔سرمایہ کاروں کو ہموار عملدرآمد اور زیادہ سے زیادہ سہولت یقینی بنانے کے لئے ممبر فنانس کی زیر نگرانی کمیٹی بنانے کا فیصلہ کمیٹی میں اسٹیٹ، ماحولیات، انفورسمنٹ اور قانون کے محکموں کے سینئر افسران شامل ہوں گے۔ چیئرمین سی ڈی اے نے ہدایت کی کہ کمیٹی نیلامی میں پیش کیے جانے والے پلاٹوں سے متعلق کسی بھی مسئلے کو فوری طور پر حل کرے اور قابل عمل تجاویز پیش کرے۔سی ڈی اے کاروبار دوست ماحول کو فروغ دینے اور سرمایہ کاروں کو اعلی معیار کے مواقع فراہم کرنے کے لئے پرعزم ہے جبکہ اسلام آباد کی مجموعی ترقی میں اپنا حصہ ڈال رہے ہیں۔
