وزیراعلیٰ پنجاب کے رمضان نگہبان کارڈ پروگرام کے تحت مستحقین کو فنڈز کی فراہمی کا عمل تیزی سے جاری ہے اور ڈپٹی کمشنر لاہور کیپٹن (ر) محمد علی اعجاز کی زیر نگرانی رمضان نگہبان کارڈز کی تقسیم کا عمل کامیابی سے آگے بڑھ رہا ہے۔ ضلعی انتظامیہ لاہور کی ٹیمیں اب تک ضلع لاہور میں 93 فیصد سے زائد رمضان نگہبان کارڈز مستحقین تک پہنچا چکی ہیں، جس کے نتیجے میں لاہور میں 99 ہزار سے زائد مستحق خاندانوں کو کارڈز کی ترسیل مکمل ہو گئی ہے۔ اسسٹنٹ کمشنرز کی سربراہی میں فیلڈ ٹیمیں مستحقین کے گھروں تک کارڈز کی رسائی کو یقینی بنا رہی ہیں۔ ڈی سی لاہور کیپٹن (ر) محمد علی اعجاز نے ہدایت کی ہے کہ بقیہ تمام کارڈز کی مستحقین تک فوری اور شفاف ترسیل کو یقینی بنایا جائے اور کارڈز کی تقسیم کے پورے عمل میں مکمل شفافیت برقرار رکھی جائے۔ انہوں نے افسران کو حکم دیا کہ مستحقین کو رقم نکلوانے میں ہر ممکن سہولت فراہم کی جائے اور موصول ہونے والی شکایات کا فوری ازالہ کر کے شہریوں کو ریلیف دیا جائے تاکہ کوئی بھی مستحق شخص حکومتی ریلیف سے محروم نہ رہے۔ ڈی سی لاہور کا کہنا تھا کہ ضلعی انتظامیہ لاہور مستحقین کو ان کا حق پہنچانے کے لیے مکمل طور پر پرعزم ہے اور ہم شفافیت کو یقینی بنا کر ہر حقدار تک رسائی حاصل کر رہے ہیں، لاہور کے شہریوں کی خدمت کے لیے تمام دستیاب وسائل بروئے کار لائے جا رہے ہیں۔
لاہور میں 99 ہزار سے زائد مستحق خاندانوں کو رمضان نگہبان کارڈز کی ترسیل مکمل، 93 فیصد سے زائد ہدف مکمل
