شاہراہوں کی تعمیر کو مقررہ ڈیڈ لائن تک مکمل کرنے کے حوالے سے ایک اہم اجلاس منعقد ہوا جس کی صدارت صوبائی وزیر مواصلات ملک صہیب احمد بھرتھ نے کی۔ اجلاس میں ایڈیشنل سیکرٹری، اسپیشل سیکرٹریز، چیف انجنیئر اور ایکسین و ایس ڈی اوز نے آن لائن شرکت کی۔صوبائی وزیر کو واہگہ روڈ لاہور، للہ جہلم روڈ (128 کلومیٹر) اور گجرات سالم تا سرگودھا روڈ (94.30 کلومیٹر) پر جاری کاموں کے حوالے سے تفصیلی بریفنگ دی گئی۔ بتایا گیا کہ واہگہ روڈ پر بی آر بی نہر کی جانب کام مکمل کر لیا گیا ہے جبکہ خوب صورت فواروں کی تعمیر بھی مکمل کر دی گئی ہے۔ صوبائی وزیر نے سروس روڈ اور پانی کے نکاس کے کام کو مکمل کرنے کے لیے محکمہ ہاؤسنگ پنجاب سے فوری رابطہ کرنے کی ہدایت کی۔للہ جہلم روڈ کے 128 کلومیٹر پر مشتمل منصوبے کے پانچ سیکشنز پر کام جاری ہے جن میں سے سیکشن فائیو مکمل کر لیا گیا ہے۔ صوبائی وزیر نے سیکشن فور پر سڑک کے درمیان لگے پولز کو ہٹانے کے عمل میں تیزی لانے کی ہدایت کی اور پولز کو سست روی سے ہٹانے پر اظہار ناپسندیدگی کرتے ہوئے کمشنر راولپنڈی سے فوری رپورٹ طلب کر لی۔ انہوں نے چیف انجنیئر کو فوری موقع کا دورہ کرنے اور پانچوں سیکشنز کی خود مانیٹرنگ کرنے کی ہدایت بھی کی۔ بریفنگ میں بتایا گیا کہ سیکشن تھری پر سب بیس کا کام 80 فیصد مکمل کر لیا گیا ہے۔ صوبائی وزیر نے للہ جہلم روڈ کو مقررہ وقت پر مکمل کرنے کی ہدایت جاری کی۔گجرات سالم تا سرگودھا روڈ پر بیس کورس کا کام جاری ہے۔ صوبائی وزیر نے شاہراہوں کی تکمیل کے لیے ایف ڈبلیو او اور نسپاک سے مکمل رابطہ رکھنے کی ہدایت کی۔ انہوں نے کہا کہ وزیر اعلیٰ پنجاب شاہراہوں کی تعمیر کے ہر منصوبے کو ڈیڈ لائن کے مطابق مکمل کروانا چاہتی ہیں۔صوبائی وزیر ملک صہیب احمد بھرتھ نے ہدایت کی کہ جو منصوبہ شروع کیا جائے اسے فوری مکمل کیا جائے اور آنے والی پیچیدگیوں اور رکاوٹوں پر بروقت قابو پایا جائے۔
پنجاب،شاہراہوں کی تعمیر کو مقررہ ڈیڈ لائن تک مکمل کرنے کے حوالے سے اہم اجلاس،واہگہ روڈ بی آر بی پر کام مکمل
