*چیئرمین کیپیٹل ڈویلپمنٹ اتھارٹی و چیف کمشنر اسلام آباد سہیل اشرف نےاپنے عہدے کا باقاعدہ چارج سنبھال لیا*

چیئرمین کیپیٹل ڈویلپمنٹ اتھارٹی (سی ڈی اے) و چیف کمشنر اسلام آباد سہیل اشرف نے پیر کے روز اپنے عہدے کا باقاعدہ چارج سنبھال لیا۔ انہوں نے سی ڈی اے بورڈ کے ممبران سمیت دیگر سینئر افسران سے ملاقات کی۔ملاقات میں ادارے کی مجموعی کارکردگی، انتظامی امور اور جاری منصوبوں کے حوالے سے تفصیلی تبادلہ خیال کیا گیا۔ سی ڈی اے بورڈ ممبران اور متعلقہ افسران نے اپنے اپنے دائرہ اختیار سے متعلق تفصیلات پیش کیں۔اس موقع پر چئیرمین سی ڈی اے کو ادارے کے انتظامی ڈھانچے سےآگاہ کیا گیا۔ چیئرمین سی ڈی اے سہیل اشرف کو شہر میں جاری سکیموں، انفراسٹرکچر کی بہتری، عوامی سہولیات کی فراہمی اور دیگر اہم منصوبوں کی موجودہ صورتحال پر بھی بریف کیا گیا۔چیئرمین سی ڈی اے سہیل اشرف نے کہا کہ تمام منصوبوں کو مقررہ وقت کے اندر مکمل کیا جائے تاکہ شہریوں کو جلد از جلد بہتر سہولیات میسر آسکیں۔ انہوں نے کہا کہ وفاقی دارالحکومت میں جاری ترقیاتی کاموں کی بروقت تکمیل کو ہر صورت یقینی بنایا جائے۔چیئرمین سی ڈی اے سہیل اشرف نے کہا کہ سی ڈی اے کے انتظامی امور میں بہتری لانے کیلئے مؤثر اقدامات کئے جائیں گئے اور سروس ڈیلوری کو مزید بہتر بنایا جائے گا۔ انہوں نے ہدایت کی کہ عوامی سہولیات کی فراہمی میں شفافیت اور تیزی کو یقینی بنایا جائے۔ انہوں نے مزید کہا کہ ادارے کی کارکردگی کو مزید بہتر بنانے کیلئے جدید ٹیکنالوجی پر مبنی اصلاحات کی جائینگی۔