وزیراعلیٰ پنجاب مریم نواز شریف نے گندم کے کاشتکاروں کو6 ارب روپے کا باردانہ مفت دینے کا اعلان کیا ہے۔ رجسٹرڈ کاشتکاروں کو پرچیز سنٹر سے فی ایکڑ 10 بوری باردانہ دیا جائے گا۔ وزیراعلیٰ مریم نواز شریف کی زیر صدارت خصوصی اجلاس میں گندم خریداری، باردانہ اورگرین ٹریکٹرسکیم کا جائزہ لیا گیا۔ وزیراعلیٰ مریم نواز شریف نے کاشتکارسے 3500 روپے فی من گندم خریداری فوری شروع کرنے کی ہدایت کی۔ اجلاس میں کسان کارڈ ہولڈرز کاشتکاروں سے ترجیحی بنیادوں پر گندم خریدنے کا اصولی فیصلہ کیا گیا۔ اس موقع پر 3500 روپے فی من کے نرخ پر گندم خریداری کے 72 گھٹنے کے اندر کاشتکار کو ادائیگی ضروری قراردیا گیا۔ صوبائی اور ڈویژن کی سطح پر سٹرٹیجک مینجمنٹ کمیٹیاں قائم کی جائیں گی جس سے گندم خریداری کے امور کی مانیٹرنگ کی جائے گی۔ وزیراعلیٰ مریم نواز شریف کے تاریخ ساز زرعی پراجیکٹس پر 88فیصد کسانوں نے اعتماد کا اظہار کیا ہے۔ وزیراعلیٰ مریم نواز شریف نے پنجاب میں ”ورک ود پنجاب گورنمنٹ“پروگرام شروع کرنے کا بھی اعلان کیا۔ ایگریکلچر گریجوایٹ سمیت دیگر کو انٹرن شپ کے مواقع فراہم کیے جائیں گے۔ کسان کارڈ سے 100ارب روپے کے قرضوں کے اجراء کا ریکارڈ اور 99 فیصد وصولی کاریکارڈ بھی بن گیا ہے۔ اجلاس میں بتایا گیا کہ کسان کارڈ کے ذریعے 9لاکھ کاشتکاروں کی رجسٹریشن ہوچکی ہے۔ وزیراعلیٰ مریم نواز شریف نے کاشتکاروں رجسٹریشن جاری رکھنے کی ہدایت کی۔اجلاس کوبریفنگ میں بتایا گیا کہ گرین ٹریکٹر سکیم کے تحت 30 ہزار ٹریکٹرز کا ہدف مقرر کیا گیا جبکہ 20 ہزار ٹریکٹرز کاشتکاروں کو مل گئے۔ گرین ٹریکٹر سکیم اور ایگریکلچر میکانائزیشن کی وجہ سے مقامی انڈسٹری فروغ پانے لگی۔ ڈسکہ میں ہارویسٹر کی مقامی سطح پر تیاری کے لئے لوکل مینوفیکچرز بھی سرگرم عمل ہیں۔ وزیراعلیٰ مریم نواز شریف نے گفتگو کرتے ہوئے کہا کہ کسان کو متاثر نہیں ہونے دیں گے۔ زرعی ترقی کو پائیدار بنیادوں پر استوار کیا جارہا ہے۔ دو سال میں اللہ تعالیٰ کے فضل و کرم سے حقیقی زرعی انقلاب لانے کا اعزاز حاصل ہے۔
*وزیراعلیٰ پنجاب مریم نواز شریف کا گندم کے کاشتکاروں کو6 ارب روپے کا باردانہ مفت دینے کا اعلان*
