ترجمان میئر کراچی اور کراچی میٹروپولیٹن کارپوریشن میں پاکستان پیپلز پارٹی کے پارلیمانی لیڈر کرم اللہ وقاصی نے کہا ہے کہ میئر کراچی بیرسٹر مرتضیٰ وہاب کی ہدایات کے مطابق مون سون بارشوں کے پیش نظر شہر بھر میں ہنگامی اقدامات کا آغاز کر دیا گیا ہے اور بلدیاتی ادارے کسی بھی ممکنہ صورتحال سے نمٹنے کے لیے مکمل طور پر تیار ہیں۔بلدیہ ٹاؤن اور کیماڑی ٹاؤن کے یونین کونسل اراکین اور سندھ سالڈ ویسٹ مینجمنٹ بورڈ کے افسران کے ساتھ ایک اہم اجلاس کی صدارت کرتے ہوئے ترجمان میئر کراچی کرم اللہ وقاصی نے کہا کہ کراچی کے شہریوں کو بارشوں کے دوران مشکلات سے بچانے کے لیے صفائی ستھرائی، کچرے کی بروقت منتقلی، برساتی نالوں کی نگرانی اور نکاسی آب کے انتظامات کو اولین ترجیح دی جا رہی ہے۔ انہوں نے اجلاس کے شرکاء کو بتایا کہ میئر کراچی بیرسٹر مرتضیٰ وہاب کی قیادت میں شہر میں جاری ترقیاتی اور بلدیاتی منصوبوں کے ساتھ ساتھ مون سون ایمرجنسی پلان پر بھی تیزی سے عمل درآمد جاری ہے۔ترجمان میئر کراچی کرم اللہ وقاصی نے کہا کہ پاکستان میں مون سون سیزن کا آغاز ہو چکا ہے اور ملک کے مختلف حصوں میں بارشوں کا سلسلہ جاری ہے جس کے پیش نظر کراچی کے لیے بھی خصوصی حکمت عملی مرتب کی گئی ہے، انہوں نے بتایا کہ کراچی واٹر اینڈ سیوریج کارپوریشن کو ہائی الرٹ کر دیا گیا ہے اور تمام متعلقہ افسران اور فیلڈ عملے کو بارشوں کے دوران اپنی اپنی ذمہ داریاں احسن انداز میں انجام دینے کی ہدایات جاری کر دی ہیں،انہوں نے کہا کہ شہر کے نشیبی اور حساس علاقوں کی نشاندہی کر لی گئی ہے جہاں اضافی عملہ، جیٹنگ اور سکشن مشینیں اور دیگر ضروری وسائل تعینات کیے جائیں گے تاکہ کسی بھی ہنگامی صورتحال میں فوری اور موثر ردعمل یقینی بنایا جا سکے۔ ان کا کہنا تھا کہ پیپلز پارٹی کی بلدیاتی قیادت کراچی کے عوام کو تنہا نہیں چھوڑے گی اور ہر ممکن وسائل بروئے کار لائے جائیں گے۔ترجمان میئر کراچی کرم اللہ وقاصی نے مزید کہا کہ میئر کراچی بیرسٹر مرتضیٰ وہاب کی ہدایت پر تمام بلدیاتی نمائندے اپنے اپنے علاقوں میں متحرک ہیں اور شہریوں کے مسائل کے حل کے لیے مسلسل رابطے میں ہیں۔ انہوں نے شہریوں سے اپیل کی کہ بارشوں کے دوران احتیاطی تدابیر اختیار کریں، گٹروں اور مین ہولز کے ڈھکن کھولنے سے گریز کریں اور کسی بھی ہنگامی صورتحال میں متعلقہ اداروں سے فوری رابطہ کریں۔انہوں نے اس عزم کا اعادہ کیا کہ کراچی کو ایک جدید، صاف ستھرا اور محفوظ شہر بنانے کے لیے بلدیاتی حکومت دن رات کوشاں ہے جبکہ مون سون بارشوں کے دوران شہریوں کو زیادہ سے زیادہ سہولیات کی فراہمی کے لیے تمام دستیاب وسائل استعمال کیے جائیں گے۔
بلدیاتی ادارے شہر میں کسی بھی ممکنہ صورتحال سے نمٹنے کے لیے مکمل طور پر تیار ہیں،ترجمان میئر کراچی کا اجلاس سے خطاب
