میئر کراچی بیرسٹر مرتضیٰ وہاب سے جاپان کے قونصل جنرل ہٹوری ماسارو (Hattori Masaru) نے بدھ کے روز صدر دفتر بلدیہ عظمیٰ کراچی میں ملاقات کی، میئر کراچی نے جاپانی وفد کی آمد کا خیرمقدم کیا، اس موقع پر جاپان کے ڈپٹی قونصل جنرل اور ایم ڈی کراچی واٹر کارپوریشن احمد علی صدیقی بھی موجود تھے، ملاقات میں حب کینال پر پمپنگ اسٹیشن کی تنصیب اور باہمی تعاون سے متعلق امور پر تبادلہ خیال کیا گیا،میئر کراچی بیرسٹر مرتضیٰ وہاب نے کہا کہ جاپان پاکستان کے اہم شراکت داروں اور بہترین دوستوں میں شامل ہے، کراچی، بالخصوص سندھ میں ترقیاتی منصوبوں اور بحالی کے اقدامات کے لیے جاپان کا تعاون قابلِ تحسین ہے،انہوں نے حب کینال کے حوالے سے تعاون پر جاپانی حکومت کا شکریہ ادا کرتے ہوئے کہا کہ دونوں ممالک کے درمیان تعاون کو مزید فروغ دینے کی ضرورت ہے، میئر کراچی نے جاپانی سرمایہ کاروں کو کراچی میں سرمایہ کاری کی دعوت بھی دی،انہوں نے کہا کہ کراچی کی ترقی اور شہریوں کو بنیادی سہولتوں کی فراہمی کے لیے بین الاقوامی تعاون اہمیت کا حامل ہے، ترقیاتی منصوبوں میں دوست ممالک کی معاونت سے شہر کے بنیادی ڈھانچے کو بہتر بنانے اور عوام کو بہتر سہولتیں فراہم کرنے میں مدد مل سکتی ہے،انہوں نے اس امید کا اظہار کیا کہ جاپان اور پاکستان کے درمیان دوستانہ تعلقات اور باہمی تعاون کا سلسلہ مستقبل میں بھی جاری رہے گا، کراچی میں سرمایہ کاری کے وسیع مواقع موجود ہیں اور جاپانی سرمایہ کار شہر میں مختلف شعبوں میں سرمایہ کاری کرکے اقتصادی سرگرمیوں کے فروغ میں اہم کردار ادا کرسکتے ہیں،ملاقات میں حب کینال پر پمپنگ اسٹیشن کی تنصیب سے متعلق امور پر بھی گفتگو کی گئی جو شہر میں پانی کی فراہمی کے نظام کے حوالے سے اہمیت رکھتے ہیں، اس موقع پر باہمی روابط اور تعاون کو مزید مضبوط بنانے کے عزم کا اظہار کیا گیا۔
میئر کراچی بیرسٹر مرتضیٰ وہاب کی جاپانی قونصل جنرل سے ملاقات، حب کینال منصوبے پر اہم گفتگو
