چیئرمین سی ڈی اے محمد علی رندھاوا نے ممبر انجینئرنگ اور متعلقہ آفیسر کے ہمراہ مری روڈ کا دورہ سرینا چوک سے مجوزہ رابطہ کا جائزہ لیا۔
دورے کے دوران سری نگر اور مری روڈ کے سنگم پر ٹریفک کے مسئلے کو مدنظر رکھتے ہوئے سری نگر ہائی وے جنکشن میں انڈر پاس بنانے کی تجویز زیر بحث آئی۔
چیئرمین سی ڈی اے محمد علی رندھاوا نے روشنی ڈالی کہ انڈر پاس کی شکل میں ٹریفک حل سے مری اور کشمیر سے اسلام آباد جانے والے مسافروں کو سہولت ملے گی۔ انہوں نے ہدایت کی کہ سری نگر ہائی وے اور مری روڈ جنکشن پر مجوزہ انڈر پاس کو شہر میں رابطے بڑھانے کے لئے سرینا چوک انٹرچینج منصوبے کے ساتھ مربوط کیا جائے۔چیئرمین محمد علی رندھاوا کو بریفنگ کے دوران بتایا گیا کہ سری نگر ہائی وے جنکشن میں انڈر پاس کی تعمیر کے لئے مٹی ٹیسٹنگ کا آغاز ہوچکا ہے۔ مزید برآں ، منصوبے کی فزیبلٹی ، ڈیزائن اور منصوبہ بندی پر بھی کام جاری ہے۔
چیئرمین سی ڈی اے محمد علی رندھاوا نے اس بات پر زور دیا کہ اس انڈر پاس کی تکمیل سے اسلام آباد کے مسلسل ٹریفک چیلنجز کا طویل مدتی حل ہوگا۔ انہوں نے متعلقہ ٹیموں کو انڈر پاس کا ڈیزائن جلد از جلد پیش کرنے کی ہدایت کی۔ مزید برآں ، انہوں نے کہا کہ جب انڈر پاس آپریشنل ہوجائے گا تو ، مری سے سری نگر ہائی وے تک تمام ٹریفک سگنل فری ہوگی ، جس سے ہموار اور زیادہ موثر سفر کو یقینی بنایا جائے گا۔
