صوبائی وزیر بلدیات میاں ذیشان رفیق کا سیف سٹیز اتھارٹی سیالکوٹ کا دورہ، محرم کے جلوسوں اور مجالس کی سیکیورٹی کا تفصیلی جائزہ لیا۔
صوبائی وزیر بلدیات میاں ذیشان رفیق نے کہا ہے کہ وزیراعلیٰ پنجاب مریم نواز شریف کی قیادت میں عشرۂ محرم الحرام کے دوران امن و امان، بین المسالک ہم آہنگی اور شہریوں کے تحفظ کو یقینی بنانے کیلئے تاریخی نوعیت کے انتظامات کیے گئے ہیں۔ پنجاب بھر میں 1 لاکھ 10 ہزار پولیس اہلکاروں کی تعیناتی عمل میں لائی گئی ہے۔ محرم کے دوران منعقد ہونے والی 38 ہزار 217 مجالس اور جلوسوں کی سیکیورٹی فول پروف بنائی گئی ہے۔ حساس مقامات پر 79 رینجرز کمپنیز اور 59 پاک آرمی کمپنیز تعینات کی گئی ہیں تاکہ کسی بھی ناخوشگوار صورتحال سے بروقت نمٹا جا سکے۔ جلوسوں اور مجالس کی تھری ڈی میپنگ مکمل کی گئی ہے جبکہ سیف سٹی کیمروں اور ٹریکرز سے مسلسل نگرانی جاری ہے۔ سڑکوں کی صفائی، روشنی، پینے کے ٹھنڈے پانی اور دیگر سہولیات کی فراہمی کو یقینی بنایا گیا ہے۔ ریسکیو 1122 اور تمام ضلعی اسپتالوں میں ایمرجنسی نافذ کر دی گئی ہے تاکہ کسی بھی ایمرجنسی صورت حال میں فوری طبی امداد فراہم کی جا سکے۔ تمام اضلاع میں انتظامیہ، پولیس اور مجالس کے منتظمین کے درمیان مکمل رابطہ قائم ہے، جبکہ شکایات کے فوری ازالے کے لیے مانیٹرنگ سیل فعال ہیں۔میاں ذیشان رفیق نے کہا کہ پنجاب بھر میں یکم تا 10 محرم الحرام دفعہ 144 نافذ کی گئی ہے تاکہ اسلحے کی نمائش، نفرت انگیز تقاریر، اشتعال انگیز مواد، وال چاکنگ، بینرز، اور بغیر اجازت لاؤڈ اسپیکر کے استعمال پر مکمل پابندی کو یقینی بنایا جا سکے۔ 9 اور 10 محرم الحرام کو ڈبل سواری پر مکمل پابندی عائد کی گئی ہے، جبکہ ڈرون کیمروں کے استعمال پر بھی مکمل پابندی نافذ ہے۔انہوں نے واضح کیا کہ سوشل میڈیا پر نفرت پھیلانے یا فرقہ واریت کو ہوا دینے والے عناصر کے خلاف سخت کارروائی عمل میں لائی جا رہی ہے۔
صوبائی وزیر بلدیات نے شہریوں سے اپیل کی کہ وہ بھائی چارے، رواداری اور صبر کا مظاہرہ کریں تاکہ یہ مقدس ایام پُرامن ماحول میں اختتام پذیر ہوں۔
ڈپٹی کمشنر صبا اصغر علی اور ڈسٹرکٹ پولیس آفیسر فیصل شہزاد نے بریفنگ دیتے ہوئے بتایا کہ ضلع سیالکوٹ 9 اور 10 محرم کو 152 لائسنسی اور روایتی علم ، تعزیہ اور ذوالجناح کے جلوس نکالے جائیں گے جبکہ 197 مجالس کا انعقاد کیا جائے گا۔ جن کے سیکیورٹی کے فول پروف انتظامات کئے گئے ہیں جب کہ جلوسوں اور مجالس کے منتظمین سے مسلسل رابطے میں ہیں اور پولیس، بلدیہ سمیت تمام متعلقہ محکموں باہمی تعاون سے ذمہ داریوں کو بخوبی احسن انجام دے رہے ہیں۔ وزیر اعلی پنجاب کی ہدایت پر جہاں جلوسوں کے روٹس کی مرمت ، صفائی، اضافی لائٹس کی سہولت مہیا کی جارہی ہے وہی پر زائرین کیلئے ٹھنڈے مشروبات کی سبیلیں بھی لگائی گئیں ہیں۔ انہوں نے بتایا کہ 100 اضافی کیمروں کی مدد سے جلوسوں کی لائیو مانیٹرنگ کی جارہی ہے۔ایڈیشنل ڈپٹی کمشنر ریونیو محمد اقبال سنگھیڑا ،ایڈیشنل ڈپٹی کمشنر جنرل ایوب بخاری اور ڈسٹرکٹ آفیسر سیف سٹیز اتھارٹی شاہد حمید ورک بھی موجود تھے۔
