دنیا بھر میں ہر سال 20 نومبر کو عالمی یومِ اطفال منایا جاتا ہے، جس کا بنیادی مقصد بچوں کے حقوق کا تحفظ، ان کی تعلیم، صحت، بہتر نشوونما، سماجی تحفظ اور محفوظ مستقبل کے لیے عالمی سطح پر شعور اجاگر کرنا ہے۔ یہ دن محض تقریبات، سیمینارز اور تقاریر تک محدود نہیں بلکہ ریاستوں، حکومتوں، اداروں اور معاشرے کو یہ یاد دہانی بھی کراتا ہے کہ بچے کسی بھی قوم کا مستقبل ہی نہیں بلکہ حال کی سب سے اہم ذمہ داری ہیں۔عالمی یومِ اطفال منانے کا آغاز اقوام متحدہ کی جنرل اسمبلی نے 1954ء میں کیا تھا۔ اس دن کے انتخاب کے پیچھے بھی ایک تاریخی پس منظر موجود ہے۔ 20 نومبر 1959ء کو اقوام متحدہ نے بچوں کے حقوق کا اعلامیہ منظور کیا، جبکہ 20 نومبر 1989ء کو بچوں کے حقوق کا بین الاقوامی کنونشن (UNCRC) منظور کیا گیا۔ یہ کنونشن بچوں کے بنیادی انسانی حقوق کے تحفظ کے لیے ایک قانونی طور پر پابند بین الاقوامی معاہدہ ہے۔ پاکستان نے بھی 12 نومبر 1990ء کو اس کنونشن کی توثیق کرکے بچوں کے حقوق کے تحفظ کا عالمی عہد کیا تھا۔اس عالمی دن کے موقع پر مختلف ممالک میں تعلیمی سرگرمیوں، آگاہی مہمات، طبی سہولتوں، بچوں کے لیے خصوصی تقریبات اور مکالموں کا اہتمام کیا جاتا ہے۔ اقوام متحدہ کا ادارہ یونیسیف بچوں کو اپنی آواز بلند کرنے کے مواقع فراہم کرتا ہے۔ مختلف ممالک میں سرکاری عمارتوں، تاریخی مقامات اور اہم یادگاروں کو نیلی روشنیوں سے منور کیا جاتا ہے، جو بچوں کے حقوق سے وابستگی کی علامت ہے۔پاکستان میں بچوں کی صورتحال کا جائزہ لیا جائے تو آئینی ضمانتوں، قانون سازی اور حکومتی دعوؤں کے باوجود زمینی حقائق تشویش ناک ہیں۔ آئین پاکستان کا آرٹیکل 25-A پانچ سے سولہ سال تک کے بچوں کے لیے مفت اور لازمی تعلیم کی ضمانت دیتا ہے، لیکن بین الاقوامی اداروں کے مطابق تقریباً 2 کروڑ 51 لاکھ بچے اب بھی اسکولوں سے باہر ہیں۔ غربت، مہنگائی، تعلیمی اداروں کی کمی، صنفی امتیاز اور بچوں سے مشقت اس صورتحال کی بڑی وجوہات ہیں۔اکتوبر 2026ء میں پاکستان نے بچوں کے خلاف تشدد کے خاتمے کے لیے قومی حکمت عملی 2026ء تا 2031ء بھی متعارف کرائی۔ اقوام متحدہ کے مطابق ملک میں تقریباً 8 کروڑ نہیں بلکہ 12 کروڑ بچوں کی آبادی کے تناظر میں بچوں کے تحفظ کے مسائل بہت وسیع ہیں۔ تقریباً 80 فیصد بچے گھروں میں جسمانی یا نفسیاتی تشدد کا سامنا کرتے ہیں، 86 لاکھ بچے مشقت میں مصروف ہیں اور پانچ سال سے کم عمر کے 57 فیصد سے زائد بچوں کی پیدائش کا اندراج نہیں ہوتا۔ انٹرنیٹ استعمال کرنے والے 12 سے 17 سال کے بچوں میں تقریباً ہر سولہواں بچہ آن لائن جنسی استحصال یا بدسلوکی کا شکار ہوا ہے۔کم عمری کی شادی، بچوں سے بھیک منگوانا، گھریلو ملازمت، جسمانی و جنسی تشدد، اغوا، انسانی اسمگلنگ، غذائی قلت اور صحت کی ناکافی سہولتیں بھی سنگین مسائل ہیں۔ قوانین موجود ہیں لیکن ان پر عمل درآمد، مؤثر نگرانی، متاثرہ بچوں کی بحالی اور مجرموں کو سزا دلوانے کا نظام مزید مضبوط بنانے کی ضرورت ہے۔پاکستان میں عالمی یومِ اطفال منانے کا حقیقی تقاضا یہ ہے کہ ہر بچے کو تعلیم، صحت، تحفظ، شناخت اور عزت کے ساتھ جینے کا حق دیا جائے۔ حکومت کو بچوں کے تحفظ کے لیے مختص وسائل میں اضافہ، قوانین پر مؤثر عمل درآمد، اسکولوں سے باہر بچوں کی واپسی اور بچوں کے خلاف تشدد کے واقعات میں فوری انصاف یقینی بنانا ہوگا۔ والدین، اساتذہ، سماجی تنظیموں، ذرائع ابلاغ اور سول سوسائٹی کو بھی اپنی ذمہ داریاں ادا کرنا ہوں گی۔یاد رکھنا چاہیے کہ بچوں کے حقوق کسی حکومت کا احسان نہیں بلکہ ان کا بنیادی انسانی حق ہیں۔ جس معاشرے میں بچے محفوظ، تعلیم یافتہ اور صحت مند ہوں، اسی معاشرے کا مستقبل روشن ہوتا ہے۔ 20 نومبر کا اصل پیغام یہی ہے کہ بچوں کا تحفظ صرف ایک دن کا عہد نہیں بلکہ ہر دن کی قومی ذمہ داری ہے۔ماخذ و حوالہ جات: یونیسیف پاکستان، اقوام متحدہ پاکستان، عالمی ادارۂ محنت اور قومی کمیشن برائے حقوقِ اطفال کی 2025ء اور 2026ء کی رپورٹس۔
Read Next
12 گھنٹے ago
گردوارہ سچا سودا؛ بابا گورو نانک دیو جی کی انسان دوستی اور مذہبی رواداری کا تاریخی مرکز حرفِ حقیقت: محمد اقبال مغل
19 گھنٹے ago
گردوارہ پنجہ صاحب: تاریخ، عقیدت اور مہمان نوازی کا تاریخی مرکز حرفِ حقیقت: محمد اقبال مغل
23 گھنٹے ago
بابا گورو نانک دیو جی کا 557واں جنم دن، ایمن آباد کے تاریخی گوردواروں کی رونق اور سفری سہولتوں کا سوال حرفِ حقیقت: محمد اقبال مغل
2 دن ago
پاکستان کے شہروں کے ناموں میں چھپی تاریخ، تہذیب اور ثقافت۔۔۔ حرفِ حقیقت: محمد اقبال مغل
3 دن ago
بابا گورو نانک کا 557واں جنم دن، دنیا بھر سے سکھ یاتریوں کی آمد اور بند کرتار پور کاریڈور کا سوال حرفِ حقیقت: محمد اقبال مغل
Related Articles
پندرہ نومبر، عالمی یوم تحریر:تحریر سے تعلق جوڑیں، اپنے خیالات کو زندگی دیں۔۔۔ حرفِ حقیقت: محمد اقبال مغل
5 دن ago
نئے صوبوں کی تشکیل: ریفرنڈم کی تیاری یا سیاسی اتفاقِ رائے کی تلاش۔۔۔؟ حرفِ حقیقت: محمد اقبال مغل
5 دن ago

