پشاور: سڑکوں اور گلیوں میں بغیر اجازت کھدائی کرنے والے متعلقہ محکموں کے خلاف قانونی کارروائی کی جائے گی

سڑکوں اور گلیوں میں بغیر اجازت کھدائی کرنے والے متعلقہ محکموں کے خلاف قانونی کارروائی کی جائے گی۔ڈپٹی کمشنر پشاور آفاق وزیر کی ہدایت پر ایڈیشنل ڈپٹی کمشنر (فنانس) محمد اصغر سورانی کی زیر صدارت ایک اہم اجلاس منعقد ہوا، جس میں متعلقہ محکموں کے افسران نے شرکت کی۔اجلاس میں اس امر پر تشویش کا اظہار کیا گیا کہ سڑکوں اور گلیوں کی تعمیر و مرمت کے بعد بعض متعلقہ محکمے اپنی سروسز کی فراہمی کے لیے پیشگی اجازت کے بغیر دوبارہ کھدائی کرتے ہیں، جس سے نہ صرف سرکاری وسائل ضائع ہوتے ہیں بلکہ سڑکوں کی حالت متاثر ہونے کے ساتھ شہریوں کو آمدورفت میں مشکلات اور شدید عوامی تکلیف کا سامنا کرنا پڑتا ہے۔اجلاس میں واضح ہدایات جاری کی گئیں کہ آئندہ کسی بھی سڑک یا گلی میں کھدائی کا کام متعلقہ مجاز حکام سے پیشگی اجازت حاصل کیے بغیر نہیں کیا جائے گا۔ خلاف ورزی کرنے والے محکموں اور ذمہ داران کے خلاف متعلقہ قوانین کے تحت قانونی کارروائی عمل میں لائی جائے گی۔

جواب دیں

Back to top button