چیف ایگزیکٹو آفیسر آئسیکو نے چیئرمین سی ڈی اے و چیف کمشنر اسلام آباد محمد علی رندھاوا سے سی ڈی اے ہیڈکوارٹرز میں ملاقات کی. چیئرمین سی ڈی اے محمد علی رندھاوا نے چیف ایگزیکٹو آفیسر آئسیکو اور انکی ٹیم کا خیر مقدم کیا.
ملاقات میں دونوں اداروں کے باہمی تعاون اور کوارڈیشن کو بہتر کرنے پر اتفاق کیا گیا۔تفصیلات کے مطابق ملاقات میں بجلی چوری، غیر قانونی کنکشنز اور انکے روک تھام کے حوالے سے تبادلہ خیال کیا گیا. چیئرمین سی ڈی اے محمد علی رندھاوا نے کہا کہ بجلی چوری اور اسکی روک تھام کے حوالے سے کوارڈینیشن کو مؤثر بنانے کی ضرورت ہے۔ملاقات میں دونوں اداروں کا باہمی مسائل کے حل کیلئے مشترکہ کمیٹی کے قیام کا فیصلہ بھی کیا گیا. چیئرمین سی ڈی اے محمد علی رندھاوا نے کہا کہ مشترکہ کمیٹی دونوں اداروں کے درمیان اوور بلنگ، واجبات کی ادائیگی سمیت دیگر مسائل کے حل کے حوالے سے کام کرے. انہوں نے کہا کہ آئیسکو اور سی ڈی اے کے واجبات کے مسئلے کو مرحلہ وار حل کیا جائے۔چیئرمین سی ڈی اے نے کہا کہ غیر قانونی ہاؤسنگ سوسائٹیز میں نئے کنکشن کے حوالے سے آئیسکو کے ساتھ ملکر جامع حکمت عملی بنائی جائے اور سی ڈی اے کے اجازت نامے کے بغیر کوئی بھی نیا بجلی کا کنکشن فراہم نہ کیا جائے. غیر قانونی بجلی کنکشنز کے خلاف سخت قانونی کارروائی عمل میں لائی جائے.ملاقات میں اسلام آباد میں 220 کے وی کے گرڈ اسٹیشن کی تنصیب کیلئے جگہ کے حوالے سے بھی تبادلہ خیال کیا گیا. چیئرمین سی ڈی اے نے کہا کہ آئیسکو سیکٹر C-14 میں ڈویلپمنٹ کے کاموں کے ساتھ ہی بجلی کی فوری فراہمی کو یقینی بنائے. ملاقات کے اختتام پر آئیسکو اور سی ڈی اے نے مستقبل میں باہمی تعاون اور ملکر کام کرنے کے عزم کا اعادہ بھی کیا.
