پنجاب ہاؤسنگ اینڈ ٹاؤن پلاننگ ایجنسی (پھاٹا) کے ڈائریکٹر جنرل سکندر ذیشان نے ایکسپو سینٹر لاہور میں منعقدہ 3 روزہ *IAPEX 2025* نمائش میں بطور مہمانِ خصوصی شرکت کی۔ یہ نمائش انسٹیٹیوٹ آف آرکیٹیکٹس پاکستان (IAP) اور پھاٹا کے باہمی اشتراک سے منعقد کی گئی۔نمائش کا بنیادی مقصد ملکی و غیر ملکی اداروں کو جدید تعمیراتی میٹریل اور ٹیکنالوجی کی نمائش کا موقع فراہم کرنا ہے، جس سے نہ صرف تعمیراتی صنعت میں جدت آئے گی بلکہ سرمایہ کاری کے نئے مواقع بھی پیدا ہوں گے۔ڈی جی پھاٹا سکندر ذیشان نے اس موقع پر کہا کہ جدید، پائیدار اور ماڈرن شہری منصوبہ بندی ایک بہتر مستقبل کے لیے ناگزیر ہے۔ انہوں نے اس بات پر زور دیا کہ حکومتی اور نجی اداروں کے باہمی تعاون سے ہی پائیدار ترقی کے اہداف حاصل کیے جا سکتے ہیں۔وزیر اعلیٰ پنجاب مریم نواز شریف کے پائیدار ترقی پر مبنی وژن کی مکمل تائید کرتے ہوئے کہا کہ صوبہ پنجاب شہری ترقی کے جدید تقاضوں کے مطابق تیزی سے آگے بڑھ رہا ہے۔افتتاحی تقریب میں بین الاقوامی اداروں کے نمائندگان، تعمیراتی صنعت سے تعلق رکھنے والے ماہرین، انڈسٹری لیڈرز اور لاہور چیمبر آف کامرس اینڈ انڈسٹری کے صدر سمیت بڑی تعداد میں مہمانوں نے شرکت کی۔اس موقع پر ڈی جی پھاٹا نے مختلف ملکی و غیر ملکی کمپنیوں کی جانب سے لگائے گئے اسٹالز کا معائنہ کیا اور پیش کردہ مصنوعات اور ٹیکنالوجی میں گہری دلچسپی کا اظہار کیا۔پھاٹا کی جانب سے نمائش میں خصوصی آگاہی اسٹال بھی لگایا گیا، جہاں شہریوں اور اسٹیک ہولڈرز کو ہاؤسنگ اور اربن ڈویلپمنٹ سے متعلق معلومات فراہم کی گئیں۔ ترجمان کے مطابق وزیر اعلیٰ پنجاب کے وژن کے مطابق صوبہ پائیدار ترقی کی جانب مؤثر انداز میں پیش قدمی کر رہا ہے۔
