وزیراعلیٰ خیبرپختونخوا محمد سہیل آفریدی نے آئی ایم سائنسز میں منعقدہ صوبائی جامعات کی رینکنگ سے متعلق ڈیجیٹل میڈیا میٹ اپ میں شرکت کی، جہاں انہوں نے ڈیجیٹل میڈیا نمائندگان سے انٹرایکٹو سیشن میں مختلف حکومتی اقدامات، نوجوانوں، تعلیم، ٹیکنالوجی اور صوبے کو درپیش مالی و ترقیاتی امور پر اظہارِ خیال کیا۔ صوبائی وزیر برائے اعلیٰ تعلیم وبلدیات مینا خان افریدی اور متعلقہ حکام بھی شریک تھے۔ وزیراعلیٰ محمد سُہیل خان آفریدی نے صوبائی جامعات کی رینکنگ میں پہلی پوزیشن حاصل کرنے پر آئی ایم سائنسز کو مبارکباد دیتے ہوئے کہا کہ جامعات کے لیے صوبائی رینکنگ سسٹم کا اجراء اعلیٰ تعلیم کے شعبے میں ایک اہم سنگ میل ہے جو تعلیمی معیار اور مثبت مسابقت کو فروغ دے گا۔▪️ خیبرپختونخوا میں آرٹیفیشل انٹیلیجنس اتھارٹی قائم کی جا رہی ہے تاکہ نوجوانوں کو جدید ٹیکنالوجی اور ڈیجیٹل مہارتوں کے ذریعے نئے مواقع فراہم کیے جا سکیں۔ احساس نوجوان پروگرام کے تحت بلاسود قرضوں کی فراہمی جاری ہے جبکہ خواتین اور مذہبی اقلیتوں کے لیے بھی خصوصی فنڈز مختص کیے گئے ہیں۔▪️ سکول سے باہر بچوں کو دوبارہ تعلیم کی طرف لانے کے لیے رواں مالی سال پانچ ارب روپے مختص کیے گئے ہیں۔ ان کے مطابق موجودہ مالی سال امن، ترقی اور خوشحالی کا سال ثابت ہوگا اور حکومت نوجوانوں کو قومی ترقی میں مؤثر کردار کے لیے بااختیار بنا رہی ہے۔▪️ ریاست کی بعض پالیسیوں کے باعث نوجوانوں میں مایوسی بڑھی ہے جس پر سنجیدگی سے توجہ دینے کی ضرورت ہے۔ ضم شدہ اضلاع کے ساتھ ناانصافی، سرحدی تجارت کی بندش اور وسائل کی غیرمنصفانہ تقسیم جیسے مسائل کے حل کے لیے بھی مؤثر اقدامات ناگزیر ہیں۔▪️ این ایف سی ایوارڈ میں خیبرپختونخوا کا جائز حصہ 18 فیصد سے زائد بنتا ہے مگر صوبے کو صرف 14.6 فیصد وسائل دیے جا رہے ہیں، جبکہ صوبے کے مالی وسائل دیگر صوبوں میں منتقل کیے جا رہے ہیں جو عوام کے ساتھ ناانصافی ہے۔▪️ پشاور اور تمام ڈویژنل ہیڈکوارٹرز میں مرحلہ وار مفت وائی فائی فراہم کیا جا رہا ہے، جسے اگلے مرحلے میں ضم شدہ اضلاع تک توسیع دی جائے گی۔
محمد سہیل آفریدی کی آئی ایم سائنسز میں منعقدہ صوبائی جامعات کی رینکنگ سے متعلق ڈیجیٹل میڈیا میٹ اپ میں شرکت
