پاکستان میں پہلی مرتبہ موٹر ویز پر ریسکیو سروسز کیلئے ایمبولنس سروس کا آغاز کر رہے ہیں ،وزیر اعلیٰ مریم نواز شریف

وزیر اعلیٰ پنجاب مریم نواز شریف نے روڈ ایکسیڈنٹ متاثرین کی یاد میں عالمی دن پراپنے پیغام میں کہا ہے کہ ان سب کیلئے دعا مغفرت کرتے ہیں جو سڑک حادثات کی وجہ سے جدا ہو گئے۔ حادثات میں جاں بحق ہونے والوں کے لواحقین کے دکھ میں برابر کی شریک ہوں۔وزیر اعلیٰ مریم نوازشریف نے کہا کہ پنجاب میں روڈ سیفٹی کو مزید بہتر بنا رہے ہیں تاکہ کسی کے گھر کا چراغ نہ بجھے۔ حادثات سے بچاؤ کیلئے 600 سے زائد روڈز کی تعمیر و مرمت اور بحالی تیزی سے جاری ہے۔انہوں نے کہا کہ پاکستان میں پہلی مرتبہ موٹر ویز پر ریسکیو سروسز کے لئے ایمبولنس سروس کا آغاز کر رہے ہیں۔ مخصوص خدمت مراکز پر ٹریفک پولیس ماہرین کی نگرانی میں ڈرائیورز ٹریننگ پروگرامز جاری ہیں۔وزیر اعلیٰ مریم نوازشریف نے کہا کہ ٹریفک ایکسیڈنٹ متاثرین کے لئے ریسکیو 1122 سروسز کو مزید اپ گریڈ کر رہے ہیں۔پاکستان کی پہلی ائیر ایمبولینس سروس مریضوں کو گولڈن اوور میں منتقل کر رہی ہے۔انہوں نے کہا کہ ہم سب کو مل کر روڈ سیفٹی کے لئے ذمہ داری نبھانی ہوگی۔ اپنی اور دوسروں کی حفاظت کے لیے ٹریفک قوانین پر عمل درآمد کی عادت بنائیں۔