شنگھائی میں سندھ انویسٹمنٹ کانفرنس، سرمایہ کاری اور جدید ٹیکنالوجی میں تعاون پر غور

چین کے شہر شنگھائی میں سندھ انویسٹمنٹ کانفرنس کا انعقاد کیا گیا جس کا مقصد سندھ اور چین کے درمیان سرمایہ کاری، جدید ٹیکنالوجی اور ترقیاتی منصوبوں کے شعبوں میں تعاون کو فروغ دینا ہے، کانفرنس میں وزیراعلیٰ سندھ سید مراد علی شاہ، میئر کراچی بیرسٹر مرتضیٰ وہاب اور صوبائی وزراء شریک ہیں جبکہ مختلف شعبوں میں تعاون کے امکانات کا جائزہ لیا جا رہا ہے،میئر کراچی مرتضیٰ وہاب کے مطابق وزیراعلیٰ سندھ کی مختلف کمپنیوں کے نمائندوں سے ملاقاتیں بھی شیڈول ہیں جن میں سرمایہ کاری اور ترقیاتی منصوبوں سے متعلق امور پر بات چیت کی جائے گی، کانفرنس کے دوران مختلف شعبوں سے متعلق خصوصی سیشنز میں شرکت اور سندھ میں جدید ٹیکنالوجی کے استعمال کے امکانات پر غور کیا جارہا ہے،میئر کراچی نے کہا کہ شنگھائی کے مختلف گروپس کے ساتھ ترقیاتی منصوبوں اور ممکنہ حل کے حوالے سے بات چیت جاری ہے، ان کا کہنا تھا کہ چینی ٹیکنالوجی مؤثر اور تیز رفتار ترقی کے لیے اہم مواقع فراہم کرتی ہے جبکہ شنگھائی کی تیز رفتار ترقی جدید ٹیکنالوجی اور مؤثر منصوبہ بندی کی اہمیت کو اجاگر کرتی ہے،انہوں نے کہا کہ چین کے تجربات سے استفادہ کرتے ہوئے سندھ میں ترقیاتی منصوبوں کے لیے بہتر حکمت عملی اور لائحہ عمل اختیار کیا جا سکتا ہے، کانفرنس کے ذریعے سرمایہ کاری کے نئے مواقع تلاش کرنے اور سندھ و چین کے درمیان مختلف شعبوں میں باہمی تعاون کو مزید مستحکم بنانے پر توجہ دی جا رہی ہے۔