تیرہ اکتوبر یومِ وفات امیر مینائی

امیر مینائی اردو مشہور و معروف شاعر و ادیب تھے۔ وہ21 فروری 1829ء میں شاہ نصیر الدین شاہ حیدر نواب اودھ کے عہد میں لکھنؤ میں پیدا ہوئے ۔ امیر احمد نام مولوی کرم محمد کے بیٹے اور مخدوم شاہ مینا کے خاندان سے تھے۔ لکھنؤ میں پیداہوئے درسی کتب مفتی سعد اللہ اور ان کے ہمعصر علمائے فرنگی محل سے پڑھیں۔ خاندان صابریہ چشتیہ کے سجادہ نشین حضرت امیر شاہ سے بیعت تھی۔ شاعری میں اسیر لکھنوی کے شاگرد ہوئے۔ 1852ء میں نواب واجد علی شاہ کے دربار میں رسائی ہوئی اور حسب الحکم دو کتابیں شاد سلطان اور ہدایت السلطان تصنیف کیں۔ 1857ء کے بعد نواب یوسف علی خاں کی دعوت پر رامپور گئے۔ ان کے فرزند نواب کلب علی خاں نے اُن کو اپنا استاد بنایا۔ نواب صاحب کے انتقال کے بعد رامپور چھوڑنا پڑا۔ 1900 میں حیدرآباد گئے وہاں کچھ دن قیام کیا تھا۔ کہ بیمار ہو گئے۔ اور وہیں انتقال کیا۔

متعدد کتابوں کے مصنف تھے۔ ایک دیوان غیرت بہارستان، 1857ء کے ہنگامے میں ضائع ہوا۔ موجودہ تصانیف میں دو عاشقانہ دیوان مراۃ الغیب، صنم خانہ عشق اور ایک نعتیہ دیوان محمد خاتم النبین ہے۔ دو مثنویاں نور تجلی اور ابرکرم ہیں۔ ذکرشاہ انبیا بصورت مسدس مولود شریف ہے۔ صبح ازل آنحضرت کی ولادت اور شام ابد وفات کے بیان میں ہے۔ چھ واسوختوں کاایک مجموعہ بھی ہے۔ نثری تصانیف میں انتخاب یادگار شعرائے رامپور کا تذکرہ ہے، جو نواب کلب علی خان کے ایما پر 1890ء میں لکھا گیا۔ لغات کی تین کتابیں ہیں۔ سرمہ بصیرت ان فارسی عربی الفاظ کی فرہنگ ہے جو اردو میں غلط مستعمل ہیں۔ بہار ہند ایک مختصر نعت ہے۔ سب سے بڑا کارنامہ امیر اللغات ہے جس کی دو جلدیں الف ممدودہ و الف مقصورہ تک تیار ہو کر طبع ہوئی تھیں کہ انتقال ہو گیا۔

امیر مینائی 13 اکتوبر 1900ء میں ریاستِ حیدرآباد میں انتقال کرگئے

امیر مینائی مرحوم کی یہ شہرہ آفاق غزل جس کے ایک سے زیادہ اشعار زبانِ زدِ عام رہے ہیں انتہائی خوبصورت کلام (ایک ایک لفظ شاعری کی لذت سے بھرپُور)

ان شوخ حسینوں پہ جو مائل نہیں ہوتا

کچھ اور بلا ہوتی ہے وہ دل نہیں ہوتا

کچھ وصل کے وعدے سے بھی حاصل نہیں ہوتا

خوش اب تو خوشی سے بھی میرا دل نہیں ہوتا

گردن تن بسمل سے جدا ہو گئی کب سے

گردن سے جدا خنجر قاتل نہیں ہوتا

دنیا میں پری زاد دئیے خلد میں حوریں

بندوں سے وہ اپنے کبھی غافل نہیں ہوتا

دل مجھ سے لیا ہے تو ذرا بولیے ہنسئے

چٹکی میں مسلنے کے لئے دل نہیں ہوتا

عاشق کے بہل جانے سے کو اتنا بھی ہے کافی

غم دل کا تو ہوتا ہے اگر دل نہیں ہوتا

فریاد کروں دل کے ستانے کی اسی سے

راضی مگر اس پر بھی مرا دل نہیں ہوتا

مرنے کے بتوں پر یہ ہوئی مشق کہ مرنا

سب کہتے ہیں مشکل، مجھے مشکل نہیں ہوتا

جس بزم میں وہ رخ سے اٹھا دیتے ہیں پردہ

پروانہ وہاں شمع پہ مائل نہیں ہوتا

کہتے ہیں کہ دل کے تڑپتے ہیں جو عاشق

ہوتا ہے کہاں درد اگر دل نہیں ہوتا

یہ شعر وہ فن ہے کہ امیر اس کو جو برتو

حاصل یہی ہوتا ہے کہ حاصل نہیں ہوتا

امیر مینائی