سینئر سیاستدان اور سابق گورنر پنجاب میاں اظہر کی نماز جنازہ ادا کر دی گئی۔مرحوم کی نماز جنازہ قذافی سٹیڈیم لاہور کے باہر ادا کی گئی، نماز جنازہ شیخ الحدیث جامعہ اشرفیہ پروفیسر مولانا محمد یوسف نے پڑھائی۔
نماز جنازہ میں ان کے بیٹے ،تحریک انصاف کے مرکزی رہنما میاں حماد اظہر، صوبائی وزیر فیصل کھوکھر، سابق لارڈ میئر لاہور خواجہ احمد حسان، سابق وزیر خارجہ خورشید محمود قصوری، پی ٹی آئی رہنما میاں اعجاز شفیع، جمشید اقبال اور فواد چودھری سمیت اراکین پنجاب و قومی اسمبلی نے شرکت کی۔چیئرمین دنیا میڈیا گروپ میاں عامر محمود سمیت دیگر سیاسی وسماجی شخصیات اور عزیز و اقارب بڑی تعداد میں نماز جنازہ میں شریک ہوئے۔بعد ازاں سابق گورنر پنجاب میاں محمد اظہر کی تدفین کر دی گئی، میاں محمد اظہر مرحوم کو احمد بلاک گارڈن ٹاؤن قبرستان میں سپرد خاک کیا گیا۔صدر پاکستان مسلم لیگ (ن) محمد نواز شریف اور وزیراعظم محمد شہباز شریف نے سینئر سیاستدان میاں محمد اظہر کے انتقال پر افسوس اور اہل خانہ سے ہمدردی کا اظہار کیا۔میاں نوازشریف کا کہنا تھا کہ مرحوم میاں اظہر کے والد کا میاں محمد شریف مرحوم کے ساتھ دیرینہ تعلق تھا، دعاگو ہیں کہ اللہ رب العزت میاں محمد اظہر مرحوم کی مغفرت اور ان کے اہل خانہ کو صبر عطا کرے، آمین۔وزیراعلیٰ مریم نواز، وزیر دفاع خواجہ آصف اور گورنر پنجاب نے بھی میاں اظہر کے انتقال پر اظہار افسوس کیا اور اہل خانہ سے تعزیت کی۔سینئر صوبائی وزیر مریم اورنگزیب نے میاں اظہر کے گھر جا کر اہلخانہ سے تعزیت کی۔یاد رہے کہ کارکن کی حیثیت سے اپنا سیاسی کیریئر شروع کرنے والے زیرک سیاستدان میاں محمد اظہر 1988 میں لاہور کے میئر بنے جبکہ 1990 ءسے 1993ء تک گورنر پنجاب کے عہدے پر فائز رہے۔اُن کی عملی سیاسی زندگی کی ابتدائی وابستگی مسلم لیگ ن کے ساتھ تھی اور بعد میں نوازشریف کی جلا وطنی کے دوران پاکستان مسلم لیگ ق میں شامل ہوگئے،
بعدازاں اکتوبر 2011 میں پی ٹی آئی میں شمولیت اختیار کی اور فروری 2024 کے عام انتخابات میں این اے 129 سے ایم این اے منتخب ہوئے۔میاں محمد اظہر نے اپنا سیاسی کیریئر 1960 کی دہائی کے آخر میں شروع کیا۔
وہ 21 جنوری 1988 سے 6 اگست 1990تک لاہور کے لارڈ میئر رہے اور 1990-1993 تک پنجاب کے گورنر کے عہدے پر فائز رہے۔وہ بلدیہ عظمٰی لاہور کے پہلے لارڈ میئر تھے۔اس سے پہلے میاں شجاع الرحمٰن تک میٹروپولیٹن کارپوریشن لاہور کا سربراہ میئر ہوتا تھے۔میاں محمد اظہر نے 21 جنوری 1988 کو پہلے لارڈ میئر کے طور پر چارج لیا۔انہوں نے نواز شریف کے قریبی ساتھی کے طور پر مسلم لیگ (ن) میں اہم کردار ادا کیا اور 1988 کے بعد قومی اسمبلی کے رکن بنے۔ 1997 میں وہ شاہدرہ سے رکن قومی اسمبلی منتخب ہوئے۔ 1999 میں انہوں نے مسلم لیگ (ق) کی بنیاد رکھی، جو مشرف کے مارشل لاء کی حمایت میں تشکیل پائی، لیکن 2002 کے انتخابات میں وہ اپنی نشست ہار گئے۔ بعد میں وہ پاکستان تحریک انصاف میں شامل ہوئے اور 2024 سے قومی اسمبلی کے رکن بنے۔میاں محمد اظہر 2024 کے عام انتخابات میں لاہور کے حلقہ این اے-129 سے آزاد امیدوار کے طور پر کامیاب ہوئے، جہاں انہوں نے 1 لاکھ 3 ہزار 718 ووٹ حاصل کیے۔
