چیئرمین سی ڈی اے محمد علی رندھاوا کی زیر صدارت سی ڈی اے ہیڈکوارٹرز میں الیکٹرک اور فیڈر بسوں کے آپریشنز کے حوالے سے اجلاس منعقد ہوا. اجلاس میں ممبر پی اینڈ ڈی، ممبر ٹیکنالوجی، ممبر فنانس، ڈی جی ورکس، ڈائریکٹر بی آر ٹی، پی ڈی بی آر ٹی سمیت دیگر متعلقہ سنئیر حکام نے شرکت کی. چیئرمین سی ڈی اے کو فیڈر الیکٹرک بسوں کے حوالے سے تفصیلی بریفنگ دی گئی.
بریفنگ دیتے ہوئے چیئرمین سی ڈی اے محمد علی رندھاوا کو بتایا گیا کہ فیڈر روٹس پروجیکٹ کیلئے 160 الیکٹرک بسوں کو مختص کیا گیا ہے اور ان فیڈر بسوں کو بی آر ٹی کی مختلف لائنز کے ساتھ لنک کیا گیا ہے. اسی طرح فیڈر بسوں کیلئے مختلف مقامات پر 216 بس اسٹاپ اور 4 ڈپوز کے ساتھ چارجنگ انفراسٹرکچر بھی تعمیر کئے جائیں گے.بریفنگ دیتے ہوئے چیئرمین سی ڈی اے کو مزید بتایا گیا کہ رواں برس جولائی میں 4 فیڈر روٹس کا افتتاح کیا جو ابھی آپریشنل ہیں اور ان فیڈر بسوں کی روزانہ کی رائیڈر شپ اور سفر کرنے والے شہریوں کی تعداد میں خاطر خواہ اضافہ ہوچکا ہے. مزید برآں ان روٹس میں 25 دسمبر کو مزید 4 روٹس کا اِضافہ بھی کیا گیا.چیئرمین سی ڈی اے کو مزید بتایا گیا کہ جناح کنونشن سینٹر اور سیکٹر H-9 میں چارجنگ انفراسٹرکچر کا قیام بھی عمل میں لایا جاچکا ہے اور زیرہ پوائنٹ پر ان بسوں کے ڈپو کے تعمیر کا کام کا ایوارڈ جلد دیا جائے گا.چیئرمین سی ڈی اے محمد علی رندھاوا نے کہا کہ تمام 13 فیڈر روٹس کا افتتاح اور زیرو پوائنٹ پر بس ڈپو کی گراؤنڈ بریکنگ جلد کی جائے اور ہدایت کی کہ ان بسوں اور بس ٹرمینلز میں اشتہارات کے لئے ڈیجیٹل بورڈز متعارف کروائے جائیں انہوں نے کہا کہ عوامی خدمات کے معیار کو برقرار رکھنے کے ساتھ سبسڈی پر انحصار کم کیا جائے.چیئرمین سی ڈی اے محمد علی رندھاوا نے کہا کہ اسلام آباد شہر میں تمام کمرشل اور پرائیوٹ ٹرانسپورٹ کو الیکٹرک پر منتقل کرنے کے لئے جامع پالیسی ریگولیشنز متعارف کرائی جائے اور پہلے مرحلے میں سی ڈی اے اپنی تمام بسوں کو الیکٹرک وہیکل پر منتقل کرے. اسی طرح اسلام آباد میں چلنے والے مختلف پبلک سیکٹر اداروں اور یونیورسٹیوں کی بسوں کو الیکٹرک پر منتقل کرنے کے لئے سی ڈی اے ان کے ساتھ بات چیت بھی کرے.چیئرمین سی ڈی اے نے ممبر فنانس کو سبسڈی پر انحصار کم کرنے اور سی ڈی اے کے لئے الیکٹرک بسوں کو متعارف کرانے کے لئے ورکنگ کرنے کی ہدایت بھی کی اور کہا کہ ٹرانسپورٹ سسٹم کو ماحول دوست بنانے کے لئے شہریوں سمیت تمام سٹیک ہولڈرز کی حوصلہ افزائی کی جائے. اجلاس کے اختتام پر چیئرمین سی ڈی اے نے معیاری، کم خرچ اور ماحول دوست ٹرانسپورٹ نیٹ ورک کے قیام کے عزم کا اعادہ بھی کیا.
