وزیراعلیٰ خیبر پختونخوا علی امین خان گنڈاپور کی زیر صدارت محکمہ بلدیات کا اجلاس منعقد ہوا. صوبائی وزیر بلدیات ارشد ایوب خان، مشیر خزانہ مزمل اسلم، سیکرٹری بلدیات اور محکمہ بلدیات کے دیگر حکام شریک ہوئے۔
اجلاس کو اربن ایریاز ڈویلپمنٹ اتھارٹیز کو درپیش مسائل اور انکے حل پر تفصیلی بریفنگ دی گئی. اجلاس میں اربن ایریاز ڈویلپمنٹ اتھارٹیز اور تحصیل میونسپل ایڈمنسٹریشنز کو مضبوط و مستحکم بنانے کا فیصلہ کیاگیا.اجلاس میں بریفنگ کے دوران بتایا گیا کہ اس مقصد کے لیے اربن ایریاز ڈویلپمنٹ اتھارٹیز اور تحصیل میونسپل ایڈمنسٹریشنز میں نئی اصلاحات متعارف کرائی جائیں گی۔رواں سال جون تک تمام ٹی ایم ایز اور اربن ایریاز ڈویلپمنٹ اتھارٹیز میں نئی اصلاحات نافذ کی جائیں گی، اس مقصد کے لیے ٹی ایم ایز اور اربن ایریاز ڈویلپمنٹ اتھارٹیز میں بین الاقوامی سطح پر ثابت شدہ بہترین پریکٹسز اختیار کی جائیں گی. ان اداروں میں کمیٹی آف سپونسرنگ آرگنائزیشنز آف ٹریڈ وے کمیشن انٹر پرائز رسک منیجمنٹ فریم ورک نافذ کیا جائے گا۔ ٹی ایم ایز اور اربن ایریاز ڈویلپمنٹ اتھارٹیز میں انٹرنیشنل پبلک سیکٹر اکاؤنٹنگ اسٹینڈرڈز بھی نافذ کیے جائیں گے۔ نئی اصلاحات سے ٹی ایم ایز اور اربن ایریاز ڈویلپمنٹ اتھارٹیز مالی طور پر مستحکم اور انکی کارکردگی بہتر ہو جائیگی۔بریفنگ میں بتایا گیا کہ اربن ایریاز ڈویلپمنٹ اتھارٹی کوہاٹ میں پہلے ہی اصلاحات نافذ ہیں جن کے مثبت نتائج سامنے آ رہے ہیں، نئی اصلاحات سے قبل اربن ایریا ڈویلپمنٹ اتھارٹی کوہاٹ کا سالانہ 49 ملین روپے خسارہ تھا، نئی اصلاحات کے نفاذ سے اربن ایریا ڈویلپمنٹ اتھارٹی کوہاٹ کا سرپلس 25.7 ملین روپے ہوگا۔
وزیر اعلیٰ نے تمام ٹی ایم ایز اور اربن ایریاز ڈویلپمنٹ اتھارٹیز میں یوڈا کوہاٹ کا ماڈل اختیار کرنے کی ہدایت کی۔وزیر اعلٰی علی امین گنڈاپور نے کہا کہ ان اداروں کو اپنے پاؤں پر کھڑا کرنا اور انکی استعداد کو بڑھانا وقت کی ضرورت ہے، صوبائی حکومت ان اداروں کو مضبوط اور مستحکم بنانے کے لیے پر عزم ہے۔
