حکومتِ گلگت بلتستان اور این پاک انرجی لمیٹڈ (NPAK Energy) جو کہ آغا خان فنڈ فار اکنامک ڈیولپمنٹ (AKFED) کے صنعتی و انفراسٹرکچر ترقیاتی ادارے انڈسٹریل پروموشن سروسز (IPS) کی ذیلی کمپنی ہے، نے ایک سلسلۂ معاہدات پر دستخط کیے ہیں، جن کے تحت این پاک انرجی یکم جنوری 2026 سے ضلع ہنزہ میں بجلی کی پیداوار، ترسیل اور تقسیم کی مکمل ذمہ داریاں سرکاری سطح پر منظور شدہ یوٹیلیٹی آپریٹر کے طور پر سنبھالے گی۔یہ معاہدات 2020 کے اصل کنسیشن ایگریمنٹ کے تحت قائم کیے گئے طویل المدتی سرکاری۔نجی اشتراک عمل کی عملی تکمیل کا اہم سنگِ میل ہیں۔ اس اشتراک عمل کے مطابق حکومتِ گلگت بلتستان ہنزہ کے توانائی اثاثوں کی مالک رہے گی، جبکہ ان اثاثوں کا آپریشنل کنٹرول 30 سالہ مدت کے لیے این پاک انرجی کو منتقل کردیا گیا ہے۔اس شراکت داری کا بنیادی مقصد ہنزہ کے تمام باسیوں کو قابل بھروسہ، سستی اور بلا تعطل 24/7 بجلی کی فراہمی کو یقینی بنانا ہے۔ یہ اقدام معاشی ترقی، بہتر عوامی خدمات، موسمیاتی لچک میں اضافہ اور پاکستان کے اہم ترین سیاحتی مقام میں مقامی آبادی کے معیارِ زندگی کو بہتر بنانے میں مدد کرے گا۔حکومتِ گلگت بلتستان اور این پاک انرجی کے مابین قریبی تعاون کے تحت گلگت بلتستان انرجی ماسٹر پلان بھی ترتیب دیا جارہا ہے، جو مستقبل کی سرمایہ کاری میں رہنمائی کرے گا اور صوبے میں سرکاری۔نجی شراکت داری کے ماڈل کو وسعت دینے کے نئے مواقع کی نشاندہی کرے گا۔این پاک انرجی، جو IPS کے ذریعے صاف توانائی، یوٹیلیٹی مینجمنٹ اور دیہی بجلی کاری میں دہائیوں کے عالمی تجربے کی حامل ہے، ہنزہ کی بجلی پیداوار میں اضافہ کرے گی، ٹرانسمیشن اور ڈسٹری بیوشن نیٹ ورک کو مضبوط بنائے گی، اور آپریشنل کارکردگی کو بہتر کرے گی۔ کمپنی ایک جامع کارپوریٹ سوشل رسپانسبلٹی (CSR) پروگرام بھی متعارف کروائے گی، جس کے تحت کمیونٹی ڈویلپمنٹ، ماحولیات کا تحفظ، نوجوانوں کی ہنر مند تربیت اور دیگر مقامی سماجی اقدامات کو فروغ دیا جائے گا۔این پاک انرجی مقامی ملازمین کی فلاح و ترقی کے لیے پُرعزم ہے۔ ہنزہ میں محکمہ واٹر اینڈ پاور کے تحت کام کرنے والا موجودہ تمام عملہ اپنے عہدوں پر برقرار رہے گا، جس سے ملازمین اور ان کے خاندانوں کے لیے تسلسل اور استحکام یقینی ہوگا۔ کمپنی جدید آپریشنل طریقہ کار، پیشہ ورانہ تربیت اور مقامی صلاحیتوں کے فروغ میں سرمایہ کاری کرے گی، اور ایک محفوظ، بااختیار اور ہمہ گیر ماحول فراہم کرے گی جہاں ملازمین کو اعلیٰ معیار کی بجلی خدمات فراہم کرنے کے مرکزی ستون کے طور پر تسلیم کیا جائے گا۔آج کے معاہدات کے ذریعے حکومت گلگت بلتستان اور این پاک انرجی قابل بھروسہ توانائی تک رسائی، علاقائی ترقی اور بہتر سروس اسٹینڈرڈز کے مشترکہ عزم کی توثیق کرتے ہیں۔ یہ شراکت داری ہنزہ کے توانائی کے منظرنامے کو تبدیل کرنے اور اسے صاف، مؤثر اور لچکدار یوٹیلیٹی آپریشنز کے ماڈل کے طور پر پیش کرنے کی جانب ایک اہم قدم ہے۔
