وزیراعلیٰ سندھ کی نئے آئی جی پولیس سے ملاقات، جرائم اور اسٹریٹ کرائم کے خلاف سخت کارروائی کی ہدایت

وزیرِاعلیٰ سندھ سید مراد علی شاہ نے وزیراعلیٰ ہاؤس میں سندھ کے نومنتخب انسپکٹر جنرل پولیس (آئی جی) جاوید عالم اوڈھو سے ملاقات کی اور صوبائی پولیس فورس کی قیادت سنبھالنے پر انہیں نیک تمناؤں کا اظہار کیا۔ سروسز اینڈ جنرل ایڈمنسٹریشن ڈیپارٹمنٹ نے وزیراعلیٰ سندھ سید مراد علی شاہ کی منظوری سے آج یکم جنوری 2026 کو جاوید عالم اوڈھو کی تعیناتی کا نوٹیفکیشن جاری کیا۔ اللہ بخش المعروف جاوید عالم اوڈھو نے 1994 میں پولیس سروس آف پاکستان میں شمولیت اختیار کی۔ وہ صوبے کے سات اضلاع میں ایس ایس پی/ڈی پی او کے طور پر خدمات انجام دے چکے ہیں اور پولیس ٹریننگ کالج سعید آباد، کراچی کے پرنسپل بھی رہے ہیں۔ انہیں 2012 میں ڈی آئی جی کے عہدے پر ترقی دی گئی اور انہوں نے سکھر، لاڑکانہ، میرپورخاص، حیدرآباد، ویسٹ اور ساؤتھ سمیت مختلف زونز میں خدمات انجام دیں۔ 2021 میں انہیں ایڈیشنل انسپکٹر جنرل (ایڈیشنل آئی جی)، بی پی ایس-21 میں ترقی دی گئی اور وہ دو مرتبہ ایڈیشنل آئی جی پولیس کراچی کے طور پر بھی خدمات انجام دے چکے ہیں۔ جاوید اوڈھو نے دیگر صوبوں میں بھی مختلف ذمہ داریاں نبھائیں اور اقوامِ متحدہ کے مشن کوسوو میں بھی حصہ لیا۔ وہ ایک سنجیدہ اور اچھی شہرت کے حامل افسر سمجھے جاتے ہیں۔ ملاقات کے دوران وزیراعلیٰ مراد علی شاہ نے پولیس قیادت کو کراچی میں اسٹریٹ کرائم کے خاتمے کے لیے کوششیں مزید تیز کرنے کی ہدایت کی اور کہا کہ یہ مسئلہ براہِ راست عوام کے اعتماد اور شہریوں کے احساسِ تحفظ کو متاثر کرتا ہے۔ وزیراعلیٰ سندھ نے نئے آئی جی پولیس کو صوبے بھر میں امن و امان کی بحالی کو اولین ترجیح دینے کی ہدایت کی۔ انہوں نے زور دیا کہ کچے کے علاقوں میں جرائم پیشہ عناصر کے خلاف آپریشن پوری قوت کے ساتھ اور بغیر کسی وقفے کے جاری رہنا چاہیے۔ وزیراعلیٰ سندھ نے سندھ پولیس کی عوام دوست شبیہ بحال کرنے کی ضرورت پر زور دیتے ہوئے سروس ڈیلیوری بہتر بنانے اور پولیس و عوام کے درمیان اعتماد مضبوط کرنے کے لیے ٹھوس اقدامات کی ہدایت کی۔ انہوں نے پولیس فورس کی جدید خطوط پر استواری (ماڈرنائزیشن) کے مشن کو بھرپور انداز میں آگے بڑھانے کی بھی تلقین کی۔ مراد علی شاہ نے سیف سٹی پروجیکٹ کو مؤثر بنانے کے لیے نگرانی کے نظام، ٹیکنالوجی کے بہتر انضمام اور آپریشنل کارکردگی میں بہتری کی اہمیت پر زور دیا۔ انہوں نے صوبے میں منشیات کے استعمال اور اسمگلنگ کی روک تھام کے لیے منشیات کے خلاف جاری کارروائیوں کو مزید تیز کرنے کی بھی ہدایت کی۔ وزیراعلیٰ سندھ نے کہا سندھ حکومت پولیس فورس کی بہتری کے لیے جامع اقدامات کر رہی ہے، تاہم پولیس کو بھی ٹھوس اور نظر آنے والے نتائج دینا ہوں گے۔ انہوں نے نئے آئی جی پی سے قانون نافذ کرنے اور جرائم پر قابو پانے میں نمایاں بہتری یقینی بنانے پر زور دیا۔ آئی جی پولیس جاوید عالم اوڈھو نے وزیراعلیٰ کا شکریہ ادا کیا اور حکومت کی ہدایات پر مکمل عمل درآمد اور سندھ بھر میں امن و امان کو مضبوط بنانے کے لیے بھرپور عزم کا اظہار کیا۔