کمشنرلاہورڈویژن مریم خان کی زیر صدارت لاہور ڈویژن میں پیٹرول کی موجودہ صورتحال اور شہریوں کے ریونیو کیسز کے حوالے سے ڈویژنل سطح جائزہ اجلاس منعقد ہوا۔ اجلاس میں لاہور ڈویژن اضلاع کے ڈپٹی کمشنرز نے بریفنگ دی۔ ضلع لاہور کے حوالے سے بریفنگ میں کہا گیا کہ لاہور میں کل 504 پٹرول پمپس سے فیول سپلائی جاری ہے سٹاک موجود ہے۔کمشنر لاہور ڈویژن مریم خان نے ڈی سیز کو ہدایت دیتے ہوئے کہا کہ ضلع لاہور، ننکانہ، قصور اور شیخوپورہ میں فیول سپلائی بلا تعطل جاری ہے، ڈپٹی کمشنرز مکمل نگرانی رکھیں ذخیرہ اندوزی سپلائی میں رکاوٹ پر زیرو ٹالرنس ہے۔ انہوں نے کہا کہ ہر پٹرول پمپ کا ڈیٹا 24گھنٹے بعد ڈی سیز خود چیک کریں اور وفاقی ایجنسیز سے رابطہ کار رکھیں، ضلعی پٹرولیم کمیٹیوں کو فیلڈ میں متحرک رکھیں، ہر رپورٹ کو چیک کریں۔کمشنر لاہور نے ریونیو کیسز کے حوالے سے تمام اضلاع کے کورٹ ریونیو مقدمات کارکردگی کا جائزہ لیا۔ انہوں نے کہا کہ ریونیو قوانین میں ترمیمی آرڈینیس آچکا ہے اس پر من و عن عملدرآمد یقینی بنائیں، وزیراعلی پنجاب کی ترجیح ہے کہ شہریوں کے ریلیف کیلئے قانوناً کوئی تاخیر نہیں ہونی چاہئیے۔اجلاس میں ڈی سی لاہور کیپٹن ر علی اعجاز، ایڈیشنل کمشنر حامد ملہی، ڈی سی قصور آصف رضا، ڈی سی ننکانہ راو تسلیم اور ڈی سی شیخوپورہ شاہد عمران مارتھ نے شرکت کی۔
