وزیر اعلٰی خیبر پختونخوا علی امین گنڈاپور کی زیر صدارت صوبائی کابینہ کا بیسواں اجلاس، صوبائی کابینہ اراکین، چیف سیکرٹری، ایڈیشنل چیف سیکرٹریز اور متعلقہ انتظامی سیکرٹریز اجلاس میں شریک ہوئے ۔اجلاس کو موجودہ کابینہ کے فیصلوں پر عمل درآمد کی صورتحال پر بریفنگ دی گئی ۔ بریفنگ میں بتایا گیا کہ اب تک موجودہ کابینہ کے کل 19 اجلاس منعقد ہوئے
جن میں 518 اہم فیصلے کئے گئے ہیں، ان میں سے 486 فیصلوں پر مکمل طور پر عمل درآمد کیا گیا ہے جو 95 فیصد بنتا ہے، ان میں سے 7 فیصلوں پر مقررہ ٹائم لائینز کے مطابق جاری ہے، 25 فیصلوں پر عمل درآمد تاخیر کا شکار ہے۔ وزیراعلٰی نے کابینہ کے فیصلوں پر عمل درآمد کی مجموعی صورتحال پر اطمینان کا اظہار کیا ۔ علی امین گنڈاپور نے کہا کہ جن محکموں سے متعلق فیصلوں پر ابھی تک عمل درآمد نہیں ہوا، وہ محکمے اگلے اجلاس تک ان فیصلوں پر عمل درآمد یقینی بنائیں۔ انتظامی محکمے جاری شدہ ترقیاتی فنڈز کے 100 فیصد استعمال یقینی بنانے کے لئے اقدامات کریں، اب تک جاری شدہ ترقیاتی فنڈز کے استعمال کی مجموعی شرح تسلی بخش ہے، اسے مزید بہتر بنانے کی ضرورت ہے۔کابینہ اراکین عوامی مسائل کے حل کے لئے اپنے متعلقہ ریجنز میں باقاعدگی سے دورے کریں، ان دوروں میں متعلقہ منتخب عوامی نمائندوں کو بھی مدعو کئے جائیں، کابینہ اراکین اپنے اپنے محکموں کے پوٹنشیلز کو موثر انداز میں استعمال میں لانے کے لئے اقدامات اٹھائیں۔
