وزیرِ اعلیٰ سندھ سید مراد علی شاہ سے سعودی عرب کے وزیر برائے ٹرانسپورٹ اینڈ لاجسٹکس سروسز انجینئر صالح بن ناصر الجاسر نے وزیراعلیٰ ہاؤس میں ملاقات کی۔ اس موقع پر سعودی عرب کے اعلیٰ سطح کے وفد نے بھی شرکت کی۔ ملاقات میں سندھ اور سعودی عرب کے درمیان دوطرفہ تعاون، سرمایہ کاری کے مواقع اور بہتر رابطوں کے فروغ پر تفصیلی تبادلۂ خیال کیا گیا۔سعودی وفد میں پاکستان میں سعودی عرب کے سفیر نواف بن سعید المالکی، سعودی پورٹس اتھارٹی کے ایگزیکٹو سربراہ پروفیسر سلیمان بن خالد المزروعہ، وزارتِ ٹرانسپورٹ کے سینئر ایگزیکٹو پروفیسر سیف بن سعد الفقیر، وزارتِ ٹرانسپورٹ کے ایگزیکٹو امور کے افسر یاسر بن سعود المطہی، سعودی ایئرلائنز کے ڈائریکٹر ایڈمنسٹریشن پروفیسر مشارى بن محمد المسعد، اور ڈائریکٹر جنرل اسٹریٹجک پارٹنرشپ و کوآپریشن پروفیسر خالد محمد بن علی رجب سمیت دیگر اعلیٰ حکام شامل تھے۔دوسری جانب سندھ حکومت کی نمائندگی وزیر منصوبہ بندی و ترقی جام خان شورو، چیف سیکریٹری آصف حیدر شاہ، وزیرِ اعلیٰ کے سیکریٹری رحیم شیخ اور ڈائریکٹر جنرل ٹرانسپورٹ و پبلک پرائیویٹ پارٹنرشپ یونٹ اسد ضامن نے کی۔ملاقات میں دونوں فریقوں کے درمیان دوطرفہ تعلقات کو مضبوط بنانے، حجاج کرام کی سہولت اور سندھ میں ٹرانسپورٹ و انفراسٹرکچر کے شعبوں میں سعودی سرمایہ کاری کے فروغ پر جامع تبادلۂ خیال ہوا۔وزیرِ اعلیٰ مراد علی شاہ نے سعودی وفد کا خیرمقدم کرتے ہوئے کہا کہ سندھ خصوصاً ٹرانسپورٹ، لاجسٹکس اور سڑکوں کے بنیادی ڈھانچے میں سرمایہ کاری کے وسیع مواقع موجود ہیں۔ انہوں نے سعودی سرمایہ کاروں کو کراچی میں جاری اور آئندہ شروع ہونے والے بڑے ٹرانسپورٹ منصوبوں، جن میں ریپڈ ٹرانزٹ اور لائٹ ریل سسٹم شامل ہیں، میں شرکت کی دعوت دی۔وزیرِ اعلیٰ نے کہا کہ سندھ کے بڑھتے ہوئے شہری مراکز اور رابطوں کی توسیع عوامی و نجی شراکت داری کے لیے بڑی گنجائش فراہم کرتی ہے۔ انہوں نے مزید کہا کہ صوبائی حکومت غیر ملکی سرمایہ کاروں کے لیے شفاف طریقۂ کار اور سازگار کاروباری ماحول کی فراہمی کے لیے پرعزم ہے۔ملاقات میں کراچی اور مدینہ کے درمیان براہِ راست پروازوں کے آغاز پر بھی اتفاق کیا گیا جس سے پاکستان اور سعودی عرب کے درمیان تجارت، سیاحت اور عوامی روابط مزید مضبوط ہوں گے۔ دونوں فریقوں نے سمندری اور بندرگاہی شعبے میں تعاون بڑھانے پر بھی اتفاق کیا تاکہ کراچی اور سعودی بندرگاہوں کے تاریخی بحری روابط کو مزید فروغ دیا جا سکے۔سعودی وزیر انجینئر صالح بن ناصر الجاسر نے سندھ حکومت کی انفراسٹرکچر اور شہری نقل و حرکت کے منصوبوں میں کوششوں کو سراہا اور پاکستان کے ساتھ شراکت داری کو مزید وسعت دینے کے عزم کا اظہار کیا۔انہوں نے کہا کہ سعودی عرب اور پاکستان شراکت داری اور تعاون کے ایک نئے دور میں داخل ہو رہے ہیں۔ ہماری قیادت کے وژن کے تحت ہم پاکستان کی ترقی اور دونوں برادر ممالک کے تعلقات کو مضبوط بنانے کے لیے مل کر کام کرنے کے خواہاں ہیں۔وزیرِ اعلیٰ نے سعودی وزیر کا شکریہ ادا کرتے ہوئے امید ظاہر کی کہ یہ دورہ ٹرانسپورٹ، لاجسٹکس اور سرمایہ کاری کے شعبوں میں گہرے اقتصادی تعاون اور باہمی مفاد کے منصوبوں کی راہ ہموار کرے گا۔مراد علی شاہ نے کہا کہ یہ دورہ ہمارے سعودی بھائیوں کے سندھ کی صلاحیتوں پر بڑھتے ہوئے اعتماد کی علامت ہے۔ ہم اس شراکت داری کو ایسے عملی منصوبوں میں بدلنے کے منتظر ہیں جو دونوں عوام کے لیے فائدہ مند ثابت ہوں۔ملاقات کے اختتام پر دونوں فریقوں نے ایک مشترکہ ورکنگ گروپ تشکیل دینے پر اتفاق کیا جو طے شدہ منصوبوں پر پیش رفت کا جائزہ لے گا اور پاکستان سعودی عرب شراکت داری کے وسیع تر فریم ورک کے تحت نئے مواقع تلاش کرے گا۔
