عماد افتخار ملک، چیئرمین بورڈ آف ڈائریکٹرز، پنجاب میونسپل ڈیولپمنٹ فنڈ کمپنی (PMDFC)، اپنے ہمراہ اسد محمود، پراجیکٹ ڈائریکٹر، وزیراعلیٰ پنجاب ڈویلپمنٹ پروگرام (PDP)، نے این ایس اے پولیمر (پرائیویٹ) لمیٹڈ کی جانب سے چین میں واقع شینڈونگ ہائی یو انڈسٹری گروپ کمپنی لمیٹڈ کا دورہ کیا۔ اس دورے کا مقصد وزیراعلیٰ پنجاب ڈویلپمنٹ پروگرام کے تحت ایچ ڈی پی ای لائنڈ سیوریج پائپس کی تیاری کے لیے خریدی جانے والی مشینری اور اس کی ترسیل کے انتظامات کا جائزہ لینا تھا۔
یہ دورہ جدید مشینری کے معائنے کے لیے کیا گیا جو خاص طور پر 2 ملی میٹر موٹی ہائی ڈینسٹی پولی ایتھیلین (HDPE) لائننگ کے ساتھ کنکریٹ سیوریج پائپس کی تیاری کے لیے ڈیزائن کی گئی ہے۔ یہ ایک جدید اور اختراعی حل ہے جسے PMDFC نے متعارف کرایا ہے، جس کا مقصد پنجاب میں سیوریج انفراسٹرکچر کی مضبوطی، پائیداری اور عمر میں نمایاں اضافہ کرنا ہے۔دورے کے دوران وفد کو شینڈونگ ہائی یو انڈسٹری گروپ کی تکنیکی اور انتظامی ٹیموں کی جانب سے مشینری کی تکنیکی خصوصیات، پیداواری صلاحیت اور آپریشنل کارکردگی پر تفصیلی بریفنگ دی گئی۔ اس موقع پر اس بات کو یقینی بنانے کے لیے جامع تبادلۂ خیال کیا گیا کہ مشینری منصوبے کی ضروریات اور کارکردگی کے طے شدہ معیار پر پوری اترتی ہے۔ عماد افتخار ملک نے اس بات پر زور دیا کہ ایچ ڈی پی ای لائنڈ سیوریج پائپس کا استعمال دیرپا، زنگ سے محفوظ اور کم دیکھ بھال کے متقاضی سیوریج نظام کی جانب ایک اہم پیش رفت ہے، جس کے نتیجے میں سیوریج انفراسٹرکچر کی عمر روایتی 25 سے 30 سال کے مقابلے میں 100 سال تک بڑھائی جا سکتی ہے۔ انہوں نے کہا کہ اس جدید ٹیکنالوجی کے مؤثر اور وسیع پیمانے پر نفاذ کے لیے جدید مشینری کی بروقت خریداری اور تنصیب نہایت اہم ہے۔
