وزیراعلیٰ سندھ سید مراد علی شاہ نے بڑھتی ہوئی ایندھن کی قیمتوں اور مہنگائی کے اثرات سے شہریوں کو بچانے کے لیے ہدفی موٹر سائیکل فیول سبسڈی پروگرام کے تحت ڈیجیٹل رجسٹریشن نظام کا اجرا کردیا، جبکہ ایک وسیع ریلیف پیکج بھی متعارف کرایا گیا ہے۔انہوں نے کہا کہ انہوں نے مارکیٹ کے اوقات کار کے حوالے سے تاجر تنظیموں سے بھی مشاورت کی ہے اور تاجروں نے اپنی تجاویز پیش کی ہیں، جن پر حتمی فیصلے سے قبل وفاقی حکومت سے مشاورت کی جائے گی۔وزیراعلیٰ ہاؤس میں پریس کانفرنس سے خطاب کرتے ہوئے وزیراعلیٰ نے کہا کہ یہ اقدام ایک جامع ہدفی سبسڈی فریم ورک کا حصہ ہے جس کا مقصد کمزور طبقات کو براہِ راست مالی معاونت فراہم کرنا اور معاشی استحکام و شفافیت کو برقرار رکھنا ہے۔ اس موقع پر صوبائی وزراء شرجیل میمن، ناصر شاہ، مکیش چاولہ اور میئر کراچی مرتضیٰ وہاب بھی موجود تھے۔اس اسکیم کے تحت ہر رجسٹرڈ موٹر سائیکل مالک کو ماہانہ 2 ہزار روپے فراہم کیے جائیں گے، جو تقریباً 20 لیٹر ایندھن پر سبسڈی کے برابر ہوگا۔ وزیراعلیٰ نے واضح کیا کہ صرف وہی موٹر سائیکلیں اس سہولت کی اہل ہوں گی جو مالک کے اپنے نام پر رجسٹرڈ ہوں۔اس مقصد کے لیے محکمہ ایکسائز و ٹیکسیشن نے آن لائن تصدیق اور رجسٹریشن کا نظام متعارف کرایا ہے، جس کے ذریعے شہری اپنی ملکیت کی تصدیق اور ڈیجیٹل درخواست دے سکتے ہیں۔ درخواست گزاروں کو اپنا قومی شناختی کارڈ نمبر اور بینک اکاؤنٹ (آئی بین) درج کرنا ہوگا جس کے بعد انہیں خودکار تصدیق موصول ہوگی۔حکومت نے سہولت کے لیے موٹر سائیکل کی منتقلی پر عائد 500 روپے فیس ختم کردی ہے تاکہ ملکیت کی درستگی کو فروغ دیا جا سکے۔ سندھ بھر میں ایکسائز دفاتر آئندہ 15 دنوں تک صبح 8 بجے سے رات 12 بجے تک بشمول ہفتہ و اتوار، کھلے رہیں گے۔ اب تک تقریباً 1500 موٹر سائیکلیں درست مالکان کے نام منتقل کی جا چکی ہیں۔درخواست گزاروں کی رہنمائی کے لیے 634-374-111-021 پر ایک ہیلپ لائن بھی قائم کی گئی ہے۔وزیراعلیٰ نے کہا کہ حکومت نے ٹرانسپورٹرز کو اعتماد میں لے لیا ہے جنہوں نے ایندھن کی بڑھتی قیمتوں کے باوجود کرایوں میں اضافہ نہ کرنے پر اتفاق کیا ہے۔ اس مقصد کے لیے حکومت پبلک ٹرانسپورٹ آپریٹرز کو خاطر خواہ سبسڈی فراہم کر رہی ہے تاکہ کرایے 28 فروری 2026 کی سطح پر برقرار رہیں اور روزانہ سفر کرنے والے لاکھوں افراد مستفید ہوں۔سندھ میں اس وقت تقریباً 11 ہزار نجی بسیں اور 470 سرکاری بسیں چل رہی ہیں۔ حکومت نے صرف سرکاری ٹرانسپورٹ تک ریلیف محدود کرنے کے بجائے پورے نظام میں کرایوں کو منجمد رکھنے کا فیصلہ کیا ہے جس کے لیے 3 سے 4 ارب روپے کی سبسڈی دی جا رہی ہے۔ وزیراعلیٰ نے خبردار کیا کہ کرایوں میں اضافے کی کسی بھی خلاف ورزی پر سخت کارروائی کی جائے گی۔وزیراعلیٰ نے اعلان کیا کہ 3 ارب روپے کا کسان سبسڈی پروگرام بھی اسی ہفتے شروع کیا جا رہا ہے جس کے تحت چھوٹے کاشتکاروں کو مالی معاونت فراہم کی جائے گی۔مجموعی طور پر ہدفی سبسڈی فریم ورک میں بائیک سبسڈی کے لیے 13.4 ارب روپے، ٹرانسپورٹ سبسڈی کے لیے (وفاقی حکومت کے تعاون سے) 14.3 ارب روپے ماہانہ، کرایہ استحکام کے لیے 3 سے 4 ارب روپے اور کسانوں کے لیے 3 ارب روپے مختص کیے گئے ہیں۔وزیراعلیٰ نے کہا کہ حکومت ضروری اشیاء، خصوصاً آٹا اور دیگر اشیائے خورد و نوش پر بھی براہِ راست ریلیف فراہم کرنے کے طریقہ کار پر کام کر رہی ہے۔انہوں نے کہا کہ یہ اقدام مالی شمولیت کو فروغ دے گا کیونکہ شہریوں کو براہِ راست ادائیگی کے لیے بینک اکاؤنٹس کھولنے کی ترغیب دی جا رہی ہے جبکہ سیلاب کے بعد بحالی کے دوران بنائے گئے نظام سے بھی فائدہ اٹھایا جا رہا ہے۔ انہوں نے واضح کیا کہ سبسڈی پروگرام مکمل طور پر شفاف ڈیجیٹل نظام کے تحت چلایا جا رہا ہے تاکہ صرف مستحق افراد کو ہی فائدہ پہنچے۔وزیراعلیٰ نے کہا کہ ٹرانسپورٹرز اور 25 تاجر تنظیموں سے مشاورت کی گئی ہے جن میں سے اکثر نے حکومتی اقدامات کی حمایت اور تعاون پر آمادگی ظاہر کی ہے۔ایک سوال کے جواب میں انہوں نے کہا کہ دو تنظیموں کے علاوہ 25 تاجر تنظیموں نے پیٹرول کی قیمتوں میں اضافے کے خلاف احتجاج ختم کرنے پر اتفاق کیا ہے اور امید ظاہر کی کہ باقی تنظیمیں بھی موجودہ علاقائی صورتحال کو مدنظر رکھتے ہوئے خود ہی اپنے احتجاج ختم کر دیں گی۔علاقائی صورتحال اور معاشی دباؤ کا حوالہ دیتے ہوئے وزیراعلیٰ نے کہا کہ حکومت شہریوں پر اثرات کم کرنے کے لیے پیشگی اقدامات کر رہی ہے۔ انہوں نے کہا کہ حکومت شفاف اور ہدفی اقدامات کے ذریعے عوام کو تحفظ فراہم کرنے کے لیے پرعزم ہے تاکہ ریلیف ضرورت مند افراد تک پہنچے اور اہم شعبوں میں استحکام برقرار رہے۔وزیراعلیٰ نے خیرپور میں پیش آنے والے ایک حالیہ واقعے پر تشویش کا اظہار کرتے ہوئے کہا کہ اس کی مکمل تحقیقات کی جا رہی ہیں۔
