نادرا ریجنل ہیڈآفس کراچی کے ڈائریکٹر جنرل عامر علی خان نے سندھ کےوزیر بلدیات ناصر حسین شاہ سے ملاقات کی جس میں صوبے میں سول رجسٹریشن کی آن لائن خدمات کے فروغ پر تفصیلی تبادلہ خیال کیا گیا۔ملاقات کے دوران ڈی جی نادرا نے معزز وزیر کو پاک آئی ڈی موبائل ایپ کی خصوصیات اور افادیت پر بریفنگ دی جس کے ذریعے شہری شناختی دستاویزات اور سول رجسٹریشن سے متعلق بیشتر خدمات گھر بیٹھے حاصل کر سکتے ہیں۔ انہوں نے صوبائی وزیر بلدیات کو سندھ بھر میں پیدائش، شادی، وفات اور طلاق کے اندراج اور سرٹیفکیٹس کے اجراء کی خدمات کی فراہمی کے بارے میں بھی آگاہ کیا اور بتایا کہ اب اس ایپ کے ذریعے سندھ کے تمام اضلاع میں پیدائش، وفات، شادی اور طلاق کے سرٹیفکیٹس کے لیے آن لائن درخواست اور اجراء ممکن بنایا گیا ہے۔ صوبائی وزیر بلدیات سید ناصر حسین شاہ نے نادرا کے اقدامات کو سراہتے ہوئے اسے صوبہ سندھ میں ڈیجیٹلائزیشن اور عوامی سہولت کی جانب ایک اہم پیشرفت قرار دیا اور کہا کہ اس اقدام سے شہریوں کو خدمات کی فراہمی تیز اور شفافیت یقینی بنانے میں مدد ملے گی۔ سینئر صوبائی وزیر نے ڈی جی نادرا کو یقین دہانی کرائی کہ حکومت سندھ نادرا کے ساتھ مکمل تعاون جاری رکھے گی اور ان اقدامات کی ہر ممکن حمایت کرے گی۔
