وزیراعلیٰ سندھ سید مراد علی شاہ نے صوبے بھر میں توانائی کے تحفظ اور توانائی کی بچت کے اقدامات کو مضبوط بنانے کے لیے ایک جامع روڈ میپ کی منظوری دیتے ہوئے سندھ انرجی ایفیشنسی اینڈ کنزرویشن ایجنسی (سیکا) کو ہدایت کی ہے کہ توانائی کے استعمال میں کمی، سرکاری شعبے کے بجلی کے اخراجات کم کرنے اور پائیدار ترقی کے فروغ کے لیے اصلاحات پر تیزی سے عمل درآمد کیا جائے۔وزیراعلیٰ ہاؤس میں سندھ انرجی ایفیشنسی اینڈ کنزرویشن ایجنسی کے بورڈ کے پانچویں اجلاس کی صدارت کرتے ہوئے وزیراعلیٰ نے سندھ انرجی ایفیشنسی اینڈ کنزرویشن ایجنسی رولز 2022 میں ترامیم، صوبائی انرجی ایفیشنسی ٹیسٹنگ لیبارٹری کے قیام، نئے سروس ریگولیشنز اور تنظیمی ڈھانچے، صوبہ بھر میں آگاہی مہم، سرکاری عمارتوں کے انرجی آڈٹ اور ادارے کے فنڈز میں اضافے سمیت متعدد اہم اقدامات کی منظوری دی۔اجلاس میں وزیراعلیٰ کے پرنسپل سیکریٹری آغا واصف، سیکریٹری توانائی شہاب انصاری، اسپیشل سیکریٹری خزانہ اصغر میمن، سندھ انرجی ایفیشنسی اینڈ کنزرویشن ایجنسی کے بورڈ رکن افتخار احمد، جنرل منیجر سندھ انرجی ایفیشنسی اینڈ کنزرویشن ایجنسی عبدالباسط صدیقی (ویڈیو لنک کے ذریعے) اور نیشنل انرجی ایفیشنسی اینڈ کنزرویشن اتھارٹی کے منیجنگ ڈائریکٹر نے شرکت کی۔وزیراعلیٰ نے کہا کہ توانائی کی بچت اور مؤثر استعمال پائیدار اقتصادی ترقی، ماحولیاتی تحفظ اور مالیاتی ذمہ داری کے لیے ناگزیر ہو چکے ہیں۔ انہوں نے سندھ انرجی ایفیشنسی اینڈ کنزرویشن ایجنسی کو ہدایت کی کہ وہ صرف ادارہ جاتی ترقی تک محدود نہ رہے بلکہ سرکاری محکموں، صنعتوں اور گھریلو سطح پر توانائی کے استعمال میں قابلِ پیمائش کمی لانے پر توجہ دے۔انہوں نے کہا کہ بچائی جانے والی توانائی کا ہر یونٹ نئی توانائی پیدا کرنے کے مترادف ہے۔ انہوں نے زور دیا کہ توانائی کی بچت بڑھتی ہوئی توانائی کی طلب اور موسمیاتی تبدیلی کے چیلنجز سے نمٹنے کے لیے سب سے کم لاگت والا مؤثر حل ہے۔بورڈ کو بتایا گیا کہ سندھ انرجی ایفیشنسی اینڈ کنزرویشن ایجنسی کا قیام سندھ انرجی ایفیشنسی اینڈ کنزرویشن رولز 2022 کے تحت، نیشنل انرجی ایفیشنسی اینڈ کنزرویشن ایکٹ 2016 کی تعمیل میں کیا گیا تاکہ صوبائی توانائی بچت کی پالیسیوں اور پروگراموں پر عمل درآمد یقینی بنایا جا سکے۔ نومبر 2025 سے ادارے نے متعدد بنیادی اقدامات مکمل کیے ہیں، جن میں ورک پلیس سیفٹی کی تعمیل، محکمہ توانائی کا انرجی آڈٹ، ڈیجیٹل موجودگی میں بہتری اور سندھ پبلک پروکیورمنٹ ریگولیٹری اتھارٹی کے ساتھ مل کر سرکاری خریداری میں توانائی بچت کے معیارات شامل کرنا شامل ہے۔وزیراعلیٰ نے سندھ انرجی ایفیشنسی اینڈ کنزرویشن ایجنسی رولز 2022 میں مجوزہ ترامیم کا جائزہ لیتے ہوئے ان کی منظوری دی جن کا مقصد ادارہ جاتی نظم و نسق کو مضبوط بنانا، انتظامی تسلسل بہتر بنانا اور بورڈ میں تکنیکی نمائندگی کو فروغ دینا ہے۔ ان ترامیم کے تحت منیجنگ ڈائریکٹر کی تقرری سینئر سرکاری افسران یا توانائی بچت کے شعبے کے تجربہ کار ماہرین میں سے کی جا سکے گی، جبکہ تکنیکی ماہرین اور صنعتی نمائندوں کی شمولیت کے مواقع بھی بڑھائے جائیں گے۔بورڈ نے سندھ انرجی ایفیشنسی اینڈ کنزرویشن ایجنسی اور این ای ڈی یونیورسٹی آف انجینئرنگ اینڈ ٹیکنالوجی کے اشتراک سے جدید ترین انرجی ایفیشنسی ٹیسٹنگ لیبارٹری کے قیام کی منظوری بھی دی۔ ابتدائی مرحلے میں لیبارٹری میں پنکھوں، روشنی کے آلات اور الیکٹرک موٹروں کی قومی اور بین الاقوامی معیار کے مطابق جانچ کی جائے گی، جبکہ یہ توانائی بچت کی لیبلنگ، مصنوعات کی سرٹیفکیشن اور معیار کی تصدیق میں بھی معاون ثابت ہوگی۔وزیراعلیٰ نے سندھ انرجی ایفیشنسی اینڈ کنزرویشن ایجنسی اور این ای ڈی یونیورسٹی کو ہدایت کی کہ لیبارٹری کو تحقیق، جدت اور استعداد کار بڑھانے کا بہترین مرکز بنایا جائے۔ انہوں نے کہا کہ یہ سہولت توانائی بچت پر مبنی سرکاری خریداری کی آئندہ پالیسیوں اور مجوزہ سندھ گرین بلڈنگ کوڈ کے نفاذ میں اہم کردار ادا کرے گی۔بورڈ نے سندھ انرجی ایفیشنسی اینڈ کنزرویشن ایجنسی سروس ریگولیشنز 2026 اور نظرثانی شدہ تنظیمی ڈھانچے کی بھی منظوری دی، جس کا مقصد ادارے کو خصوصی تکنیکی اور ریگولیٹری مہارت سے آراستہ کرنا ہے۔ نئے ڈھانچے میں میرٹ پر مبنی بھرتی، کارکردگی کے جائزے کا نظام اور پیشہ ورانہ تربیتی پروگرام شامل کیے گئے ہیں تاکہ ادارہ جاتی استعداد کو مزید مضبوط بنایا جا سکے۔وزیراعلیٰ نے حکومت کو صاف توانائی کی ٹیکنالوجی اپنانے میں مثال قائم کرنے کی ضرورت پر زور دیتے ہوئے سندھ انرجی ایفیشنسی اینڈ کنزرویشن ایجنسی کے استعمال کے لیے الیکٹرک اور ہائبرڈ گاڑیوں کی خریداری کی منظوری دی۔ انہوں نے محکمہ توانائی کو ہدایت کی کہ گرین موبیلٹی کے اقدامات کو فروغ دیا جائے اور سرکاری اداروں کو مرحلہ وار توانائی بچانے والی ٹرانسپورٹ کی جانب منتقل ہونے کی ترغیب دی جائے۔اجلاس میں عوامی آگاہی، رسائی اور استعداد کار بڑھانے کے ایک جامع پروگرام کی بھی منظوری دی گئی۔ وزیراعلیٰ نے سندھ انرجی ایفیشنسی اینڈ کنزرویشن ایجنسی کو ہدایت کی کہ ڈیجیٹل میڈیا، تعلیمی اداروں، صنعتوں اور سرکاری محکموں کے ذریعے مسلسل آگاہی مہمات چلائی جائیں تاکہ توانائی کے ذمہ دارانہ استعمال اور رویوں میں مثبت تبدیلی کو فروغ دیا جا سکے۔بجلی پر سرکاری اخراجات کم کرنے اور ادارہ جاتی کارکردگی بہتر بنانے کے لیے بورڈ نے سندھ بھر کی سرکاری عمارتوں اور بنیادی ڈھانچے کے انرجی آڈٹ شروع کرنے کی منظوری دی۔ ان آڈٹس کے ذریعے روشنی کے نظام، حرارت، ہوا کی ترسیل اور ایئر کنڈیشننگ سسٹمز، پمپس، موٹروں اور برقی نظام میں توانائی کے ضیاع کی نشاندہی کی جائے گی، جس سے مستقبل میں بہتری، جدید کاری اور کارکردگی کے معیار کے تعین کے لیے بنیادی اعداد و شمار دستیاب ہوں گے۔مراد علی شاہ نے تمام صوبائی محکموں کو ہدایت کی کہ وہ انرجی آڈٹس کے انعقاد اور بجلی کے استعمال اور کاربن کے اخراج میں کمی کے لیے سفارشات پر عمل درآمد میں سندھ انرجی ایفیشنسی اینڈ کنزرویشن ایجنسی کے ساتھ مکمل تعاون کریں۔ انہوں نے کہا کہ بہتر توانائی نظم و نسق سے حاصل ہونے والی بچت کو عوامی فلاح اور ترقیاتی منصوبوں پر خرچ کیا جانا چاہیے۔بورڈ کو بتایا گیا کہ سندھ انرجی ایفیشنسی اینڈ کنزرویشن ایجنسی کا سالانہ بجٹ ادارے کے قیام سے اب تک 20 کروڑ روپے تھا، جسے کم استعمال کے باعث بعد میں 10 کروڑ روپے کر دیا گیا۔ تاہم ادارے کی ذمہ داریوں میں اضافے اور نئے منصوبوں کے آغاز کے باعث مالی سال 2026-27 کے لیے بجٹ کی ضرورت بڑھ کر 33 کروڑ 8 لاکھ 50 ہزار روپے ہو گئی ہے۔مجوزہ مالی منصوبے کا جائزہ لینے کے بعد وزیراعلیٰ نے لیبارٹری کے قیام، انرجی آڈٹس، عوامی آگاہی سرگرمیوں، گاڑیوں کی خریداری اور ادارہ جاتی استعداد کار بڑھانے کے لیے اضافی فنڈز کی منظوری دی۔ انہوں نے سندھ انرجی ایفیشنسی اینڈ کنزرویشن ایجنسی کو ہدایت کی کہ تمام اخراجات اور آمدنی پیدا کرنے والے اقدامات میں شفافیت، جوابدہی اور قابلِ پیمائش نتائج کو یقینی بنایا جائے۔اجلاس کے اختتام پر وزیراعلیٰ نے کہا کہ توانائی کی بچت کو سندھ کی ترقیاتی حکمت عملی کا بنیادی ستون بنایا جانا چاہیے۔ انہوں نے سندھ انرجی ایفیشنسی اینڈ کنزرویشن ایجنسی کو ہدایت کی کہ تمام منظور شدہ اقدامات پر بروقت عمل درآمد کو یقینی بنایا جائے اور پیش رفت سے متعلق باقاعدہ رپورٹس پیش کی جائیں۔اجلاس نے متفقہ طور پر ایجنڈے کے تمام نکات کی منظوری دے دی۔
*توانائی کے استعمال میں کمی، سرکاری شعبے کے بجلی کے اخراجات کو کم کیا جائے، وزیراعلیٰ سندھ*
