وزیر محنت و افرادی قوت شاہد عبدالسلام تھہیم کی زیر صدارت سیسی گورننگ باڈی کا 170واں اجلاس منعقد ہوا جس میں محنت کشوں، افسران اور طبی شعبہ کی بہتری کے لیے متعدد اہم فیصلے کیے گئے۔ اجلاس میں کمشنر سیسی میانداد راہوجو، ڈپٹی سیکریٹری لیبر اور میڈیکل ایڈوائزر ڈاکٹر کامران اعوان سمیت دیگر اہم شخصیات نے شرکت کی۔ اجلاس میں گزشتہ اجلاسوں کے منٹس کی توثیق، محنت کشوں کے لیے خیرسگالی کی بنیاد پر مالی امداد میں اضافے کی منظوری کا فیصلہ کیا گیا ہے۔طبی شعبہ میں سروس ریگولیشنز 2023 میں ترامیم کی گئیں اور سیسی کے میڈیکل سرکلز اور ڈسپنسریوں کے اوقات کار میں تبدیلی اور مشیروں و ماہرین کے لیے خصوصی پیکج کا فیصلہ بھی کیا گیا ہے۔ دوا ساز کمپنیوں کو بقایاجات جبکہ کینسر کے مریضوں کے علاج کے لیے فنڈز کی ادائیگیوں کی منظوری بھی دی گئی۔ کلثوم بائی ولیکا سوشل سیکورٹی اسپتال کی تزئین و آرائش، اسپتالوں کے لیے طبی آلات کی خریداری اور کینسر کے علاج کے لیے بجٹ مختص کرنے کا فیصلہ کیا گیا۔ قانونی مشیر ،مشیر فنانس اور آئی ٹی ڈائریکٹر کی تقرری کا فیصلہ کیا گیا ہے جبکہ سال 2024-25 اور 2025-26 کے چارٹر آف ڈیمانڈ کی منظوری بھی دی گئی۔ مالی سال 2019-20 کے بیرونی آڈٹ کی منظوری دی گئی ۔ وزیر محنت شاہد عبدالسلام تھہیم نے کہا ہےکہ محنت کشوں، افسران اور طبی شعبہ کی بہتری کے لیےہر ممکن اقدام کریں گے۔ مسائل کا حل اولین ترجیح ہے۔ طب کے شعبہ کی بہتری کے لئے جدید آلات کے استعمال کا فیصلہ کیا ہے۔ محنت کش طبقے کو اسٹیٹ آف دی آرٹ اسپتال کی فراہمی یقینی بنائیں گے۔
