صوبائی وزیر توانائی، ترقیات و منصوبہ بندی سندھ سید ناصر حسین شاہ نے کہا ہے کہ کم عمری اور جبری شادی کے حوالے سے بنائے گئے قانون سازی پر سب سے زیادہ عملدرآمد ہمارے صوبے میں کیا جارہا ہے اور چیئرمین بلاول بھٹو کی ہدایت پر دیگر صوبوں کے مقابلے میں سندھ میں یہ قانون سختی سے نافذ ہے۔ ان خیالات کا اظہار انھوں نے آرٹس کونسل کراچی میں کم عمری اور جبری شادی کے حوالے سے صوبائی سطح پر آگاہی پروگرام میں مہمان خصوصی کی حیثیت سے اپنے خطاب میں کیا۔
تقریب کا انعقاد ایس پی او اور خیرپور، جیکب آباد کی سول سوسائٹی تنظیموں نے کیا تھا۔ جمیل اصغر بھٹی منیجر پروجیکٹس اور گرانٹس (SPO)، منزہ علی کنٹری منیجر (Save the Children)، صائمہ آغا پارلیمانی سیکریٹری برائے اسپورٹس اینڈ یوتھ افیئرز سمیت دیگر شخصیات بھی موجود تھیں۔ تقریب میں روائٹی اور ثقافتی اشیاء کے اسٹال نمائش کے لئے لگائے گئے تھے ۔وزیر توانائی سید ناصر حسین شاہ نے لگائے گئے اسٹالز پر رکھی گئی مصنوعات کو دیکھا اور کام کو سراہا۔ تقریب سے خطاب کرتے ہوئے سیدناصرحسین شاہ نے کہا کہ ایک بہت اہم موضوع کا یہ پروگرام ہے جس کے تحت شعور و آگاہی دی جارہی ہے۔ سول سوسائٹی کی اس کاوش کو سراہتے ہیں اور سندھ حکومت کی جانب سے مکمل تعاون کی یقین دہانی کراتے ہیں۔ صوبائی وزیر کا مزید کہنا تھا کہ ہماری خواہش ہے کہ سکھر میں بھی یہ پروگرام شروع کیا جانا چاہئے۔ خیرپور اور جیکب آباد کے پسماندہ علاقوں میں یہ پروگرام بہت اچھے انداز میں جاری ہے۔ سندھ حکومت اس پر پہلے ہی قانون سازی کرچکے ہیں۔ اس دفعہ بلوچستان میں بھی پاکستان پیپلزپارٹی کی حکومت ہے۔ یہ قانون بلاول بھٹو کے وژن کے مطابق ہے اور ہم پرامید ہیں وزیر اعلی بلوچستان بھی اس قانون میں ضرور معاونت کریں گے۔ اس قانون سازی پر سب سے زیادہ عملدرآمد سندھ میں ہوا ہے۔ قانون سازی دیگر صوبوں میں بھی ہوئی ہے امید ہے اس پر عمل ہوگا۔ قانون کو سمجھنے کے لئے شعور اور سمجھ بھی ضروری ہے۔ شعور و آگاہی کا ناہونا بھی قانون پر عملدرآمد کرانے میں اہم رکاوٹ ہے۔ اس پلیٹ فارم کی خدمات سب کے سامنے ہے ایسے سیشنز سے پورے سندھ میں لوگوں میں شعور و آگاہی آرہی ہے۔ چیئرمین بلاول بھٹو جب وزیر اعظم ہونگے تو اس قانون کو پورے ملک میں نافذ کیا جائے گا۔ چودہ اگست کے حوالے سے بہترین تقریبات کا انعقاد کریں اور اس میں بھرپور شرکت کریں۔ تقریب کے اختتام پر سیدناصرحسین شاہ کو اعزازی شیلڈ دی گئی۔
