پنجاب پلاننگ اینڈ ڈویلپمنٹ بورڈ نے مالی سال 2024-25 کے صوبائی ڈویلپمنٹ ورکنگ پارٹی کے 62 ویں اجلاس میں مختلف سیکٹرز کی 4 ترقیاتی سکیموں کے لیے مجموعی طور پر 24 ارب 91کروڑ 87لاکھ 59ہزار روپے کے فنڈز کی منظوری دی۔ اجلاس کی صدارت چیئرمین پلاننگ اینڈ ڈویلپمنٹ بورڈ بیرسٹر نبیل احمد اعوان نے کی۔ صوبائی ورکنگ پارٹی کے اجلاس میں ترقیاتی بورڈ کی جانب سے جن سکیموں کی منظوری دی گئی ان میں گوجرانوالہ میں جی ٹی روڈ (بینظیر چوک) تا لاہور -سیالکوٹ موٹر وے (واہنڈو انٹر چینج) دو رویہ روڈ کی تعمیر (ترمیمی) کیلئے 9 ارب 97کروڑ روپے، لاہور میں قائداعظم انٹر چینج (لاہور رنگ روڈ) تا واہگہ بارڈر جی ٹی روڈ کی تعمیر و مرمت اور بحالی (ترمیمی) کیلئے 5 ارب 60کروڑ روپے، ملتان میں نادر آباد پھاٹک تا انڈسٹریل اسٹیٹ فلائی اوور کی تعمیر (ترمیمی) کیلئے 5 ارب 37کروڑ 60لاکھ روپے اور مری میں بنسرہ گلی زولوجیکل گارڈن کی از سر نو تعمیر کیلئے 3 ارب 97کروڑ 27لاکھ 59 ہزار روپے شامل ہیں۔
اجلاس میں صوبائی سیکرٹری پی اینڈ ڈی بورڈ ڈاکٹر آصف طفیل سمیت چیف اکانومسٹ محمد مسعود انور، متعلقہ سیکرٹریز، محکمہ جات کے اعلی افسران اور پنجاب پلاننگ اینڈ ڈویلپمنٹ بورڈ کے ممبران نے شرکت کی۔
