خصوصی افراد کے لئے خیبر پختونخوا حکومت کا اہم اقدام، خصوصی افراد کی مالی معاونت کے لئے 37 کروڑ روپے کی مالیت سے پروگرام کا اجراء کردیا۔ پروگرام کے تحت صوبے کے 37 ہزار خصوصی افراد کو فی کس 10 ہزار روپے دئے جا رہے ہیں۔ وزیر اعلی خیبر پختونخوا علی امین خان گنڈاپور نے پروگرام کا اجراء کردیا۔ پروگرام کے تحت خصوصی افراد کو مالی امداد کی فراہمی کے لئے وزیراعلی ہاؤس پشاور میں تقریب کا انعقاد کیا گیا ۔ وزیراعلٰی نے خصوصی افراد میں مالی امداد کے چیکس تقسیم کئے۔اس موقع پر خطاب کرتے ہوئے علی امین خان گنڈاپور نے کہا کہ آج سے صوبے میں سرکاری کاغذات میں معذور کا لفظ لکھنے کی ممانعت ہوگی، ان افراد کے لئے تمام سرکاری کاغذات میں خصوصی افراد کا لفظ لکھا جائے۔ خصوصی افراد منفرد اور خصوصی صلاحیتوں کے مالک ہوتے ہیں، انہیں اپنی صلاحیتوں کو اجاگر کرنے کے لئے مواقع فراہم کرنے کی ضرورت ہے، خصوصی افراد سمیت معاشرے کے تمام کمزور طبقوں کی سرپرستی ریاست کی ذمہ داری ہوتی ہے۔
معاشرے کے کمزور طبقوں کے لئے فلاحی اقدامات بانی چئیرمین کے وژن کا اہم جز یے، ہمارے دور حکومت میں خصوصی افراد سمیت کوئی بھی کمزور طبقہ حکومتی سپورٹ کے بغیر نہیں رہے گا۔بے سہارا اور بے آسرا لوگوں کی ذمہ داری صوبائی حکومت لے گی، معاشرے کے کمزور طبقوں کی معاونت کے لئے ایک جامع حکمت عملی کے تحت کام کر رہے ہیں، صوبہ بھر میں خصوصی افراد، بیواوں اور یتیموں سمیت تمام مستحق لوگوں کا ڈیٹا اکٹھا کر رہے ہیں۔ صوبائی حکومت کے تمام فلاحی اقدامات کو مستقل بنیادوں پر چلانے کے لئے انہیں ریگولر بجٹ کا حصہ بنا رہے ہیں، فلاحی اقدامات اور کمزور طبقوں کی معاونت کے لئے مالی وسائل کی کوئی کمی نہیں ہوگی۔خصوصی افراد کا الیکٹرک وہیل چئیرز کی فراہمی کا پروگرام شروع کر رہے ہیں، پہلے مرحلے میں خصوصی سرکاری ملازمین اور اعلیٰ تعلیمی اداروں کے خصوصی طلبہ کو الیکٹرک وہیل چیئرز دیں گے، دوسرے مرحلے میں سکولوں میں زیر تعلیم خصوصی طلبہ کو وہیل چیئرز دی جائیں گی۔ہم نے جہیز فنڈ سے دی جانی والی رقم کو 25 ہزار سے بڑھا کر 2 لاکھ کر دیا ہے، اسی طرح زکوٰۃ کی مد میں دی جانے والی رقم کو بڑھا کر دگنا کر دیا ہے، ضعیف اور بیوہ خواتین کی معاونت کے لیے راشن کارڈ کا اجراء کر رہے ہیں۔ یتیم اور یسیر بچوں کی کفالت کے لئے بھی پروگرام شروع کر رہے ہیں، بے سہارا بزرگ شہریوں کے لیے اسٹیٹ آف دی آرٹ اولڈ ہوم بنائیں گے جس میں تمام سہولیات فراہم کی جائیں گی۔ خواجہ سراؤں کے لیے پناہ گاہ قائم کر رہے ہیں تاکہ وہ عزت سے رہ سکیں۔
