وزیر اعلیٰ سندھ سید مراد علی شاہ نے شاہراہِ بھٹو پر کورنگی کازوے کے مقام پر انٹرچینج کے ڈیزائن کی منظوری دے دی ہے جبکہ ملیر کے تین گوٹھوں کے تحفظ کے لیے چار کلومیٹر طویل فلائی اوور کی تعمیر کی بھی اجازت دے دی ہے۔
وزیر اعلیٰ نے نشاندہی کی کہ کورنگی کازوے سے شاہراہِ بھٹو کی طرف جانے والا ابتدائی مقام جام صادق انٹرچینج سے 200 میٹر پہلے واقع ہے۔ انہوں نے کہا کہ ڈی ایچ اے اور کورنگی کے درمیان رابطے کو بہتر بنانے کے لیے ضروری ہے کہ موجودہ کورنگی کازوے پر ایک مستقل انٹرچینج یا چوراہا تعمیر کیا جائے۔ انہوں نے کہا کہ اس سے کورنگی، ڈی ایچ اے اور شاہراہِ فیصل (کے پی ٹی انٹرچینج) سمیت تمام سمتوں سے ٹریفک کی روانی میں سہولت ملے گی۔یہ ذکر کرنا ضروری ہے کہ شاہراہِ بھٹو کی حد تک زمین کی بھرائی کا کام مکمل ہونے کے قریب ہے۔ وزیر اعلیٰ نے شاہراہِ بھٹو کے پروجیکٹ ڈائریکٹر (پی ڈی) کو ہدایت دی کہ وہ پی سی-ون تیار کر کے آئندہ تین دنوں میں محکمہ پلاننگ اینڈ ڈویلپمنٹ (پی اینڈ ڈی) کو منظوری کے لیے جمع کروائیں۔
انہوں نے کورنگی کازوے انٹرچینج کے چوراہے کی تکمیل کی ڈیڈ لائن بھی مقرر کرتے ہوئے کہا کہ یہ منصوبہ دسمبر 2025 تک مکمل ہونا چاہیے۔وزیر اعلیٰ مراد علی شاہ کو بتایا گیا کہ شاہراہِ بھٹو (جام صادق انٹرچینج) سے جوڑنے کے کام کو ان کی منظوری کا انتظار کرتے ہوئے معطل کر دیا گیا تھا۔ تفصیلی مشاورت کے بعد انہوں نے انٹرچینج کے ڈیزائن کی منظوری دے دی۔ جام صادق انٹرچینج پر کام 58 فیصد مکمل ہو چکا ہے تاہم یہ منصوبہ ییلو لائن پروجیکٹ کی وجہ سے رکا ہوا ہے۔ وزیر اعلیٰ نے ٹرانسپورٹ ڈیپارٹمنٹ کو ہدایت دی کہ وہ ییلو لائن کے ایک کلومیٹر طویل حصے کو جون تک مکمل کرے تاکہ انٹرچینج کو فعال کیا جا سکے۔
تین بستیوں کے تحفظ کے لیے فلائی اوور کا فیصلہ
وزیر اعلیٰ نے ایک اہم فیصلہ کرتے ہوئے ملیر ندی کے کنارے چار کلومیٹر طویل فلائی اوور تعمیر کرنے کی منظوری دی تاکہ سموں گوٹھ، لاسّی گوٹھ اور پرانا شفیع گوٹھ کو بے دخل ہونے سے بچایا جا سکے۔ فلائی اوور کا ڈیزائن ایک کنسلٹنٹ کی جانب سے تیار کیا گیا ہے۔39 کلومیٹر طویل شاہراہِ بھٹو ایک تیز رفتار، تین لینز پر مشتمل، جدید سہولیات سے آراستہ ایکسیس کنٹرولڈ سڑک ہے۔ یہ سندھ کا سب سے بڑا پبلک پرائیویٹ پارٹنرشپ منصوبہ ہے، جو ڈی ایچ اے اور کورنگی کو حیدرآباد موٹروے کے قریب کاٹھوڑ سے منسلک کرتا ہے۔
شاہراہِ بھٹو پر چھ مخصوص انٹرچینجز بنائے گئے ہیں جو شمالی سمت جانے والی ٹریفک اور کراچی کے مختلف صنعتی علاقوں کو تیز رفتار رسائی فراہم کرتے ہیں۔ اس ایکسپریس وے کو ٹولنگ میکانزم کے تحت ڈیزائن کیا گیا ہے جس میں ہر داخلی اور خارجی مقام پر ٹول پلازے اور گیٹس کی گنجائش موجود ہے۔وزیر اعلیٰ کو بتایا گیا کہ ای بی ایم انٹرچینج کا کام مکمل ہو چکا ہے جبکہ قائد آباد انٹرچینج 85 فیصد مکمل ہے۔ انہوں نے متعلقہ پروجیکٹ ڈائریکٹر کو ہدایت دی کہ اسے 30 اپریل تک مکمل کر کے ٹریفک کے لیے کھول دیا جائے۔
یہ بھی بتایا گیا کہ ڈملوٹی انٹرچینج پر کام جاری ہے تاہم میمن گوٹھ انٹرچینج پر پیش رفت کراچی الیکٹرک (کے الیکٹرک) اور مقامی کنوؤں کی مداخلت کی وجہ سے سست ہو گئی ہے۔ وزیر اعلیٰ نے محکمہ توانائی اور مقامی حکومت کو ہدایت دی کہ کے الیکٹرک کی لائنز اور کنوؤں کی منتقلی کے عمل کو تیز کیا جائے۔شاہراہِ بھٹو 38.661 کلومیٹر طویل تین لینز پر مشتمل ایک سڑک ہے جسے 100 کلومیٹر فی گھنٹہ کی رفتار کے لیے ڈیزائن کیا گیا ہے۔ اس کا رائٹ آف وے 100 میٹر ہے اور اس پر چھ انٹرچینجز، دو مرکزی ٹول پلازے اور دس درمیانی ٹول پلازے شامل ہیں۔ پروجیکٹ کے پہلے حصے یعنی کورنگی کازوے سے قائد آباد تک کا 95 فیصد تعمیراتی کام مکمل ہو چکا ہے جبکہ مجموعی طور پر منصوبے کی پیش رفت 78 فیصد ہے۔
