وزیر اعلٰی خیبر پختونخوا علی امین گنڈاپور سے بنوں قومی جرگہ کے وفد کی ملاقات ہوئی ۔ صوبائی وزیر پختون یار خان، ایم این مولانا نسیم شاہ اور ایم پی اے عدنان وزیر کے علاوہ علاقے کے سیاسی و سماجی شخصیات، عمائدین اور علماء وفد میں شامل تھے۔ چیف سیکرٹری اور ایڈیشنل چیف سیکرٹری داخلہ خیبر پختونخوا کے علاوہ متعلقہ کمشنر، آر پی او، ڈپٹی کمشنر اور ڈی پی او بھی اس موقع پر موجود تھے۔
ملاقات میں بنوں میں امن و امان کی موجودہ صورتحال اور متعلقہ امور پر تبادلہ خیال کیا گیا۔ وفد نے گزشتہ روز بنوں میں منعقد ہونے وال قومی جرگے کے مطالبات سے وزیراعلی کو آگاہ کیا۔ وفد نے بنوں میں سڑکوں کی بندش سے علاقے کے لوگوں کو درپیش مشکلات سے بھی وزیراعلی کو اگاہ کیا۔ وزیر اعلٰی نے بنوں قومی جرگے کے مطالبات سے اصولی اتفاق کیا، ان مطالبات کے حل کے لئے لائحہ عمل تیار کرنے کا فیصلہ کیا گیا ۔ برخواست شدہ پولیس اہلکاروں کی بحالی، فورتھ شیڈول اور 3 ایم پی او وغیرہ سے متعلق معاملات کے حل کے لئے کمیٹی تشکیل دینے کا فیصلہ ہوا۔ جرگہ اراکین نےعلاقے میں امن کے قیام کے لئے حکومت کو مکمل تعاون فراہم کرنے کی یقین دہانی کروائی ۔
صوبائی ایپکس کمیٹی کے منظور شدہ 16 میں سے 12 نکات پر عمل درآمد کیا گیا ہے، باقی چار مطالبات پر عمل درآمد کے لئے کوششیں جاری ہیں، بنوں شہر میں عوام کی آمدورفت کے لئے بند سڑکوں کو مرحلہ وار کھولنے کے لئے طریقہ کار وضع کیا جائے گا، علی امین گنڈاپور نے کہا کہ دہشتگردی کے خاتمے کے لئے عوام کا اعتماد بہت ضروری ہے، ہم سسٹم پر عوام کا اعتماد بحال کرنے کے لئے اقدامات کر رہے ہیں، علاقے کے عوام علاقے سے دہشتگردوں کو نکالنے کے لئے حکومت کے ساتھ تعاون کریں۔صوبے کے کسی بھی علاقے میں ملٹری آپریشن نہیں ہو رہا، دہشتگردوں کے خاتمے کے لئے اینٹیلجنس بیسڈ آپریشنز جاری رہیں گے، دہشتگردی کے خلاف پولیس کو لیڈ رول دیا جا رہا ہے،اس سلسلے میں پولیس خصوصا سی ٹی ڈی کو مستحکم کیا جارہا ہے۔
