وزیراعلیٰ سندھ سید مراد علی شاہ سے امریکی ناظم الامور نٹالی بیکر نے ملاقات کی جس میں امریکا اور حکومتِ سندھ کے درمیان باہمی تعاون پر تبادلہ خیال کیا گیا خصوصاً موسمیاتی تبدیلی اور اس کے اثرات پر زور دیا گیا۔یہ ملاقات وزیراعلیٰ ہاؤس میں ہوئی جس میں امریکی قونصل جنرل اسکاٹ اوبیرم، چیف سیکریٹری سندھ آصف حیدر شاہ، پرنسپل سیکریٹری آغا واصف اور دیگر اعلیٰ حکام شریک ہوئے۔وزیراعلیٰ سندھ مراد علی شاہ اور نٹالی بیکر نے زرعی ترقی اور جدید کاشتکاری ٹیکنالوجیز کے استعمال سمیت مختلف دوطرفہ امور پر خیالات کا تبادلہ کیا۔ دونوں نے تعلیم، صحت کے شعبوں اور سرمایہ کاری میں تعاون پر بھی غور کیا اور ماحولیاتی چیلنجز سے نمٹنے کے لیے مشترکہ اقدامات کی ضرورت پر زور دیا۔سیلاب متاثرہ کمیونٹیز کی بحالی اور گھروں کی تعمیر نو پر بھی بات چیت کی گئی۔ مراد علی شاہ نے بتایا کہ ان کی حکومت سیلاب متاثرین کے لیے 21 لاکھ گھر تعمیر کر رہی ہے اور ان کو مالکانہ حقوق دے دیے گئے ہیں۔نٹالی بیکر نے سندھ حکومت کی ترقیاتی کوششوں پر اطمینان کا اظہار کیا اور امریکا کی جانب سے جاری تعاون اور حمایت کی یقین دہانی کرائی۔ مراد علی شاہ نے امریکی حکومت کا شکریہ ادا کیا اور دوطرفہ تعلقات کو مزید مضبوط بنانے کے عزم کا اعادہ کیا۔ملاقات خوشگوار ماحول میں ہوئی جس میں دونوں فریقین نے باہمی تعلقات کو مزید فروغ دینے پر اتفاق کیا۔
