لاہور ویسٹ مینجمنٹ کمپنی کی جانب سے ماہِ رمضان میں شہریوں کو صاف ماحول کی فراہمی یقینی بنانے کے لیے صفائی کے خصوصی انتظامات کیے جا رہے ہیں۔سی ای او بابر صاحب دین کی ہدایت پر16 رمضان سہولت بازاروں اور سستے چینی مراکز پر 2 شفٹوں میں ایل ڈبلیو ایم سی کے 100 سے زائد تعینات ورکرزصفائی یقینی بنا رہے ہیں جبکہ ایل ڈبلیو ایم سی کا صفائی عملہ روزانہ کی بنیاد پر شہر کے 9ٹاؤنز میں مساجد کی صفائی دھلائی پر بھی مامور ہے۔راوی ٹاؤن،شالیمار ٹاؤن،عزیز بھٹی ٹاؤن، گلبرگ ٹاؤن،ڈی جی بی ٹی،سمن آباد ٹاؤن، علامہ اقبال ٹاؤن،نشتر ٹاؤن اورواہگہ ٹاؤن کی مساجد میں واشنگ ایکٹیویٹی کی جا رہی ہے۔مزید برآں رمضان المبارک میں تمام ٹاؤنز میں تراویح کے مقامات اورجامع مساجد پر خصوصی صفائی ٹیمیں تعینات ہیں۔ مساجد اور تراویح مراکز کے گرد اورملحقہ راستوں پر صفائی اور پانی کا چھڑکاؤ کیا جا رہا ہے۔ سالڈ ویسٹ سے متعلق شکایات کو ہر 30 منٹ کے بعد چیک کرنے اور رمضان سہولت بازار سے موصول ہونے والی شکایات کو 10 منٹ میں حل کرنے کی ہدایت جاری کر دی گئی ہے۔شہری صفائی سے متعلق شکایت کی صورت میں ہیلپ لائن 1139 پر رابطہ کریں۔
