حیدرآباد میں جشنِ آزادی کی مرکزی تقریب سرکٹ ہاؤس حیدرآباد میں منعقد ہوئی، ڈویژنل کمشنر حیدرآباد فیاض حسین عباسی نے میئر حیدرآباد کاشف علی شورو کے ہمراہ قومی پرچم لہرایا۔اس موقع پر ڈی آئی جی حیدرآباد طارق رزاق دھاریجو، ڈپٹی کمشنر زین العابدین میمن، ایس ایس پی عدیل حسین چانڈیو، میونسپل کمشنر ظہور احمد لکھن، ایڈیشنل ڈپٹی کمشنر ون گدا حسین سومرو، ایڈیشنل ڈپٹی کمشنر ٹو صبا کلوڑ سمیت مختلف محکموں کے افسران، معزز شخصیات اور عوام کی بڑی تعداد نے شرکت کی
۔تقریب کا آغاز تلاوتِ قرآنِ پاک سے ہوا، جس کے بعد پرچم کشائی کی گئی اور پولیس کے چاق و چوبند دستے نے سلامی پیش کی۔ تقریب کی نظامت انفارمیشن آفیسر ثوبیہ سلیم نے انجام دی۔ مختلف اسکولوں کے طلبہ نے حب الوطنی اور معرکۂ حق کے موضوعات پر تقاریر، ملی نغمے اور ٹیبلوز پیش کیے۔خصوصی مہمانوں کی جانب سے مختلف شخصیات اور افسران کو بہترین کارکردگی پر اعزازی شیلڈز بھی پیش کی گئیں۔تقریب سےخطاب کرتے ہوئے ڈی آئی جی طارق رزاق دھاریجو نے کہا کہ اس سال ملک بھر میں جشنِ آزادی کی تقریبات نے نئی روح پھونک دی ہے۔ ایس ایس پی عدیل حسین چانڈیو نے کہا کہ یکم اگست سے 14 اگست تک مختلف تقریبات کا انعقاد کیا گیا، جس میں عوام کا جوش و جذبہ مثالی رہا، اور ہمیں عہد کرنا چاہیے کہ ملک و قوم کی ترقی کیلئے بھرپور کردار ادا کریں۔میئر کاشف علی شورو نے کہا کہ اس سال جشنِ آزادی کا جوش و خروش اپنی مثال آپ ہے۔ انہوں نے افواجِ پاکستان کی بھارت کے خلاف کارکردگی کو سراہتے ہوئے شہداء، ذوالفقار علی بھٹو اور بینظیر بھٹو کو خراج عقیدت پیش کیا۔ڈویژنل کمشنر فیاض حسین عباسی نے طلبہ کی ٹیبلوز اور تقاریر کو سراہتے ہوئے کہا کہ جس طرح یکم اگست سے 14 اگست تک تقریبات کے ذریعے حب الوطنی کا ثبوت دیا گیا، وہ ناقابلِ فراموش ہے۔ انہوں نے کہا کہ ہماری افواج نے بھارت کے آپریشن سندور کو تندور میں بدل کر دشمن کے عزائم خاک میں ملا دیے۔ ڈپٹی کمشنر زین العابدین میمن نے تمام مہمانوں کا شکریہ ادا کرتے ہوئے کہا کہ جشنِ آزادی کی تقریبات نے شہریوں کے دلوں میں حب الوطنی کا جذبہ مزید مضبوط کیا ہے۔ تقریب کے اختتام پر ڈویژنل کمشنر، ڈی آئی جی اور میئر حیدرآباد نے شجرکاری مہم کا آغاز کیا۔
