گلگت ڈویلپمنٹ اتھارٹی (جی ڈی اے) کے افسران کے تین رکنی ٹیم نے ایف ڈی اے کمپلیکس کا دورہ کیا اور بریفنگ سیشن میں شرکت کی۔ ٹیم میں گلگت ڈویلپمنٹ اتھارٹی کے ڈائریکٹر جنرل اظہار اللہ، چیف انجینئر عارف حسین اور اسسٹنٹ ڈائریکٹر کوآرڈنیشن محمد مصطفی شامل تھے۔ ڈائریکٹر جنرل ایف ڈی اے محمد آصف چوہدری نے افسران کی ٹیم کا خیر مقدم کیا اور بریفنگ کے دوران انہیں ایف ڈی اے کے تنظیمی ڈھانچے، دائرہ اختیار، لیگل فریم ورک، اربن ڈویلپمنٹ کے امور، ذرائع آمدن اور مختلف ترقیاتی پالیسیوں پر عملدرآمد کی حکمت عملی سے آگاہ کیا۔ ڈائریکٹر آئی ٹی یاسر اعجاز چٹھہ، پی ایس او شبیر ساجد گجر ودیگر بھی اس موقع پر موجود تھے۔ ڈائریکٹر جنرل ایف ڈی اے نے گلگت ڈویلپمنٹ اتھارٹی کے افسران کی ٹیم سے ایف ڈی اے کی ورکنگ کے حوالے سے اپنے بعض تجربات اور انتظامی معاملات کی سانجھ کی۔ انہوں نے بتایا کہ ایف ڈی اے کے ذرائع آمدن میں اضافہ کے لئے متعدد اقدامات کئے جا رہے ہیں جبکہ ڈیجیٹل ٹیکنالوجی کو بروئے کار لاتے ہوئے تیز رفتار سروس کی ڈیلیوری کویقینی بنایا گیا ہے۔ انہوں نے پیری اربن سٹریکچر پلان کے نمایاں پہلوئوں، بلڈنگز کنٹرول، ہائوسنگ سکیموں کی منظوری کے امور اور اربن ڈویلپمنٹ کے حوالے سے مستقبل کی پلاننگ کے بارے میں آگاہ کرتے ہوئے بتایا کہ ہائوسنگ کے شعبہ میں ایف ڈی اے سٹی ایک میگا پراجیکٹ ہے جس میں زندگی کی تمام سہولیات موجود ہیں۔انہوں نے بتایا کہ ایف ڈی اے سٹی میں سٹیٹ آف دی آرٹ سپورٹس کمپلیکس قائم کیا گیا ہے جس میں عالمی معیار کی ان ڈور گیمز کی سہولیات دستیاب ہیں اور اس کے انتظامی امور کمشنر فیصل آباد کی سربراہی میں مینجمنٹ کمیٹی کی زیرنگرانی چلائے جا رہے ہیں۔ انہوں نے شہر کی ماسٹر پلاننگ کے حوالے سے بعض مشکلات اور ترقیاتی و انتظامی امور میں درپیش بعض چیلنجز سے بھی آگاہ کیا ۔ ڈائریکٹر جنرل گلگت ڈویلپمنٹ اتھارٹی اظہار اللہ نے عمدہ مہمان نوازی پر ڈی جی ایف ڈی اے کا شکریہ ادا کیا اور جی ڈی اے کی ماسٹر پلاننگ کے بعض پہلوئوں کے بارے میں بتایا۔ انہوں نے کہا کہ اس دورے سے ایف ڈی اے کی ترقیاتی حکمت عملی ، انتظامی امور دائرہ اختیار اور متعلقہ قوانین پر عملدرآمد کی پالیسیوں کے بارے میں آگاہی اور افسران کے تجربات سے مستفید ہونے کا موقع ملا ہے۔بعد ازاں ڈائریکٹر جنرل ایف ڈی اے محمد آصف چوہدری نے گلگت ڈویلپمنٹ اتھارٹی کے ڈائریکٹر جنرل اظہار اللہ کو یادگاری شیلڈ پیش کی۔
